Përgjigjja e Papës Benediktit XVI në librin-intervistë “Drita e botës”, ishte
shumë e qartë. “Kur Papa bindet plotësisht se nuk është më në gjendje fizike, mendore
e shpirtërore ta kryejë detyrën mirë, që i është besuar, atëherë ka të drejtë,
e në disa rrethana, edhe detyrë, të tërhiqet”. Duke shtuar edhe se tërheqja është
e mundur, vetëm në një çast qetësie, e jo në mes të situatave shqetësuese e të
trazuara për Kishën. Parë me syrin e historisë, rastet e ndërprerjes së papnisë
para vdekjes së Papës, janë shumë të rralla e, në asnjë rast, nuk shikojmë një situatë,
që të na kujtojë tërheqjen e Benediktit XVI. Në agimin e jetës së Kishës, kur
predikimi i Apostujve ishte realitet i vërtetë, i jetuar e i dëshmuar drejtpërdrejt,
gjejmë figurën e papës Klementi: e gjejmë në listën e ipeshkvijve të Romës, hartuar
nga Ireneu i Lionit, si pasardhës i tretë i Shën Pjetrit, pas Linit e Anakletit. Burimet
nuk janë të njëzëshme, gjë që na pengon ta përcaktojmë datën e saktë të papnisë së
tij. Sipas Euzebit të Çezaresë, vendin e Klementit e zuri Anakleti, në vitin e dymbëdhjetë
të Domicianit, domethënë në vitin 92 (Historia Ecclesiastica, III, 15). Por
Shën Jeronimi, duke u mbështetur mbi traditën, mendon se Klementi ishte pasardhësi
i parë i Shën Pjetrit. Epifani nga Salamina shpreh mendimin se Klementi u caktua
nga Apostujt t’i zëvendësonte në drejtim të Kishës së Romës, në sa ata ishin të impenjuar
në shërbimin apostolik. Arrin në këtë përfundim, duke u mbështetur tek Letrat, që
nga ajo drejtuar Romakëve, deri tek ajo Korintianëve, në të cilat nxiten më bujarët
të largohen, para se të bëhen shkaktarë për lindjen e mosmarrëveshjeve, përçarjeve
e kundërvënieve, që trondisin jetën e Kishës. Epifani shpreh mendimin se Klementi
u tërhoq nga drejtimi i barkës së Shën Pjetrit, për të mos krijuar probleme. Por,
pas vdekjes së Shën Pjetrit, të Linit e Kletit, tre Papët e parë të Kishës katolike,
u detyrua ta rifillonte ministerin papnor. Nuk duhet harruar se jemi në një kohë
të mugët, kur lajmet mungojnë ose vijnë deri në kohët tona në formën e legjendave,
pa bazë historike. Është koha martirizimit të të krishterëve e ata, që zgjidheshin
për misionin e lartë të Kryebariut të Kishës Katolike, bëheshin gati për t’u shqyer
nga bishat në amfiteatër. Nga Klementi kalohet tek Ponciani. Është i 18-ti ipeshkëv
i Kishës së Romës, që e nisi misionin e tij ipeshkvnor rreth vitit 230. Burimi më
i besueshëm, Katalogu liberian, saktëson se ministeri i tij zgjati pesë vjet,
dy muaj e tri ditë. Në vitin 235 Ponciani u internua në Sardenjë, së bashku me priftin
Hipoliti, ku punoi në minierë. Katalogu kujton datën e dorëheqjes së Papës Ponciani
nga ministeri papnor me termen teknike discinctus est, më 28 shtator dhe fronëzimin
e Pasardhësit, Anterit, grek me origjinë lindore, më 21 nëntor. Ponciani, siç
hamendësohet në Enciklopedinë e Papëve, ka shumë mundësi të ketë hequr dorë nga froni
i Shën Pjetrit, i nxitur nga mendimi i admirueshëm, se nuk do të dilte i gjallë nga
galeritë e minierave e se Kisha nuk mund të lihej për këtë arsye, pa Timonier. Tre
shekuj pas tij, në krye të Kishës së Romës vjen Papa Silveri. Pas vdekjes së babait
të tij, papës Ormisda, në vitin 523, shkroi epitafin, sot të humbur, në të cilin
shprehte kënaqësinë për përpjekjet e pajtimit me Lindjen dhe çlirimin e Afrikës. Nuk
dihet në se asokohe Silveri kishte hyrë në radhët e klerit, sepse në mbishkrim nuk
shënohet kurrfarë titulli, por dihet mirë se kur vdiq, në Kostandinopojë, më 22 prill
536, papa Agapito ishte subdiakon i Kishës romake. Kandidatura e tij për fronin
e Papnisë, e imponuar nga mbreti Teodati, sipas kronistit të Liber pontificalis,
shkaktoi pakënaqësi të madhe në gjirin e klerit, që e konsideroi kandidatin me rang
modest, prej këndej, të papërshtatshëm për hjerarkinë kishtare. Ishte hera e parë
që një subdiakon ulej në fronin e papnisë. Silveri luftoi kundër monofizitëve në
Koncilin, që u mbajt më 4 qershor të vitit 536. Kjo e nxiti perandoreshën monofizite
Teodora t’i dërgojë një letër gjeneralit Belisari, përmes së cilës i kërkonte internimin
e Papës. Belisari iu bind urdhërit dhe e internoi Papën Silveri në ishullin e Palmarolës,
duke e mbyllur në një manastir. Burime të tjera pohojnë se ai u akuzua për tradhti
të lartë dhe vdiq, i harruar, në një skutë të Greqisë. Në një epokë tjetër papnon
Benedikti IX, në shekulll Teofilati, nga kontët e Tuskolos, në fronin e Shën Pjetrit
prej shtatorit 1032, deri më 1044. Ai e laicizoi pushetin papnor, duke sunduar si
të ishte mbret, jo Papë, dhe e përdori për qëllimet e veta, jo të Krishtit, gjë që
nuk do të kalonte pa pasoja. U dëbua nga Roma, por u rikthye para se të pësonte disfatën
e plotë. Analet romake pohojnë se në vitin 1044 në Romë shpërtheu një revoltë kundër
Papës, i cili u detyrua ta braktisë fronin. Vendin e tij e zuri ipeshkvi i Sabinës,
Gjoni, që u quajt Silvestri III. Por edhe ai, vetëm pas 49 ditësh papnimi, u lëviz
nga froni prej Benediktit IX, që u rikthye në fronin e Shën Pjetrit, ku vijoi të papnojë
deri më 1 maj 1045. Në këtë datë iu desh t’ia lëshonte vendin Gjon Gracianit, që zgjodhi
emrin Gregori VI. Por me që e kishte zënë këtë vend me para, sipas zakoneve të
këqija të kohës, nuk e mbajti gjatë. Enriku III thirri, në Sutri, një Koncil, duke
i ftuar të tre papët protagonistë të ngjarjeve në dy vitet e fundit. Silvestri III
nuk u paraqit. Gregori VI, i vetmi, që ishte i pranishëm, u emërua papë në Krishtlindjen
e vitit 1046, por u çfronësua menjëherë nga Klementi II, që nuk pati papni të gjatë,
sepse vdiq papritmas, më 9 tetor 1047. Benedikti IX u kthye përsëri në fronin papnor,
duke shfrytëzuar largimin e Enrikut III nga Italia, i mbështetur fuqimisht nga Bonifaci
i Kanosës. Enriku, ndërkaq, i kërkoi Bonifacit t’i prijë në Romë Papës së ri, të zgjedhur
nga ai vetë. Quhej Popone, e ishte nga Bresanone. Si papë, zgjodhi emrin Damazi II.
Bonifacit, të frikësuar nga kërcënimet e mbretit, iu desh të dorëzohej e ta shoqëronte
papën gjerman në qytetin e amshuar, duke ndikuar në largimin përfundimtar të Benediktit
IX, që u strehua në kështjellat e Sabinës. Këtu Teofilati vijoi ta konsideronte veten
Papë, të larguar padrejtësisht nga froni, Pas rastit më të njohur të largimit nga
froni papnor, atij të Çelestinit V, vjen Papa i fundmë, që dha dorëheqjen nga froni
i Shën Pjetrit, Gregori XII, të cilit iu desh, ndërmjet shumë trazirash, t’u kundërvihej
edhe antipapëve, Benedikti XIII e Gjoni XXIII (emër që, më pas, do ta merrte papa
Ronkali), gjatë skizmës së Lindjes.