Амерыканскі кардынал: будучы Папа – падарожнік і карыстальнік новымі СМІ
Будучы Папа павінен
будзе шмат падарожнічаць і карыстацца новымі СМІ. Такога меркавання прытрымліваецца
амерыканскі кардынал Дональд Вюрл, арцыбіскуп Вашынгтона. У інтэрв’ю Ватыканскаму
радыё іерарх расказаў, што патрэба ў падарожжах стала тэрміновай для сённяшніх Рымскіх
Пантыфікаў. Ён назваў гэту неабходнасць “служэннем прысутнасці”. “Папа павінен быць
побач са сваім статкам ва ўсім свеце”, - сказаў ён і дадаў, што выкананне гэтага задання
патрабуе вялікіх намаганняў. Іншы аспект будучага пантыфікату, на думку амерыканскага
кардынала, звязаны з тым фактам, што зараз чалавецтва жыве ў эпоху хуткай камунікацыі.
“Гэта эпоха, калі людзі чэрпаюць большую частку інфармацыі з крыніц адрозных ад традыцыйных
– мы жывем у свеце сацыяльных медыя”, - сказаў кардынал Вюрл. На яго думку, Бэнэдыкт
XVI за час свайго пантыфікату зрабіў вялікую справу: ён шмат падарожнічаў і адначасова
пачаў карыстацца новымі СМІ, каб звяртацца да свету.
Падводзячы вынікі знаходжання
Бэнэдыкта XVI на Пасадзе св. Пятра, кардынал Вюрл адзначыў, што галоўным чынам Папа
“вёў секулярызаваны свет да сустрэчы з Богам”. Паводле кардынала, Сінод Біскупаў па
новай евангелізацыі, які восенню 2012 г. праходзіў у Рыме, стаў “кульмінацыяй усяго
таго, што Папа прапаведваў падчас сваго пантыфікату”. Папа “заклікаў звяртацца да
тых людзей, асабліва дарослай моладзі, якія думаюць, што Касцёлу больш няма чаго ім
даць і такім чынам зноў вярнуць іх, зноў прапанаваць ім Евангелле Хрыста”. Гэта, на
думку амерыканскага іерарха, застанецца вялікай спадчынай Бэнэдыкта XVI і накірункам
на будучыню.