Бэнэдыкт XVI: учынак міласэрнасці – гэта абвяшчэнне Евангелля
Хрысціянская міласэрнасць
не можа быць зведзена да ўзроўню гуманітарнай ініцыятывы, таму што яна выяўляе любоў
Бога да чалавецтва. З такімі словамі Бэнэдыкт XVI звярнуўся да членаў бельгійскага
дабрачыннага фонда “Pro Petri Sede”, якія 15 лютага прыбылі на аўдыенцыю ў Ватыкан.
Святы Айцец адзначыў, што міласэрнасць, калі рэалізуецца ў хрысціянскім духу, нясе
з сабой не толькі канкрэтную дапамогу патрабуючым, але таксама любоў і дабрыню Бога.
Навучыцца такой міласэрнасці можна дзякуючы веры, аб якой паразважаў Бэнэдыкт XVI.
“Вера – гэта жывая рэальнасць, якая павінна пастаянна адкрывацца і паглыбляцца, для
таго, каб узрастаць. Менавіта яна павінна кіраваць позіркам і дзейнасцю хрысціяніна.
Тут гаворка ідзе пра новы крытэрый свядомасці і дзейнасці, які змяняе жыццё чалавека”,
- сказаў Святы Айцец.
Паводле Бэнэдыкта XVI вера асвятляе жыццё і яго розныя
аспекты з іншай перспектывы, гэта значыць, што таксама і сведчанне хрысціянскай міласэрнасці
павінна абапірацца на гэта ўнутранае святло. “Вера без міласэрнасці не прынясе плёна
і міласэрнасць без веры будзе толькі пачуццем пастаянна напоўненым сумнівамі. Вера
і міласэрнасць узаемасвязаны, так, што адна дапамагае другой спаўняцца”, - адзначыў
Пантыфік.
Папа падкрэсліў таксама, што матэрыяльная дапамога, хоць і з’яўляецца
неабходнай, аднак не адлюстроўвае поўнага значэння міласэрнасці. Апошняя, паводле
Святога Айца з’ўляецца ўдзелам у ахвяраванай і раздзеленай з іншымі любові Хрыста.
“Сапраўдная міласэрнасць – гэта канкрэтная праява любові Бога да людзей”, - сказаў
Папа і дадаў, што ў такім выпадку, яна становіцца абвяшчэннем Евангелля.