Հիւսիսային Քորէայի Հիւլէական Փորձը Միջազգային Դատապարտումի Ալիք Մը Բարձրացուց
Հիւսիսային Քորէա այդ ուղղութեամբ զգուշացումները անտեսելով եւ մինչեւ օրս հիւլէական
իր ամէնէն հզօր փորձը կատարեց: Վիեննայի մէջ դէտեր յայտնեցին, որ գետնին տակ տեղի ունեցած
պայթումը 2009-ին տեղի ունեցած վերջին փորձին ուժին կրկնապատիկն էր, հակառակ անոր որ
օգտագործուած կազմածը աւելի փոքր էր: ՄԱԿ-ի ընդհանուր քարտուղար Պան Քի Մուն դատապարտեց
փորձը` զայն նկատելով ՄԱԿ-ի որոշումներու «յստակ եւ լուրջ խախտում» մը, ինչպէս նաեւ «խորապէս
անհանգստացնող» գրգռութիւն մը: Միացեալ Նահանգներու նախագահ Պարաք Օպամա փորձը «մեծապէս
գրգռիչ արարք մը» նկատեց եւ կոչ ուղղեց միջազգային «արագ» ու «հաւաստի» հակադարձութեան:
Հիւսիսային Քորէայի գլխաւոր դաշնակից Չինաստանի արտաքին գործոց նախարար Եանկ Ժիշի «խիստ
դիտողութիւն» ներկայացուց Փեքինի մէջ Հիւսիսային Քորէայի դեսպանին եւ Չինաստանի «խոր
դժգոհութիւնն ու վճռակամ ընդդիմութիւնը» արտայայտեց փորձին նկատմամբ: Հիւլէական փորձը
քննադատեցին նաեւ Հարաւային Քորէան, Ճափոնը, Ռուսիան, Ֆրանսան, Փաքիստանը եւ Իրանը: Վերջինս
հիւլէական ռումբերէ զուրկ աշխարհի մը ստեղծման կոչ ուղղեց: