Հայր Վարդան Վրդ. Գազանճեան «Լրատու»ին կը խօսի Պենետիկտոս 16-րդ Պապի հրաժարականին մասին։
Լիբանան- «Լրատու»ի Պէյրութի թղթակիցը այսօր յատուկ զրոյց մը ունեցաւ Պէյրութի Հայ
Կաթողիկէ Պատրիարքարանի Մամուլի եւ տեղեկատուութեան կեդրոնի պատասխանատու ՝ Հայր Վարդան
Վարդապետ Գազանճեանին հետ: Զրոյցին նիւթը եղած է, երէկ մամուլի բոլոր ծառայութիւններուն
ուշադրութեան կէտը դարձած ՝ Հռոմի Պէնէտիքթոս 16-րդ Պապին ներկայացուցած անակնկալ
հրաժարականին լուրը:Հայր Վարդան Վրդ. Գազանճեան խօսելով Պապի Հրաժարումին մասին ըսած
է ՝ «Սրբազան Քահանայապետին հրաժարականին առնչութեամբ, կը յիշեմ իր մէկ հարցազրոյցը,
որուն ընթացքին պատասխանած է թէ ան իր հրաժարականը չի կրնար ներկայացնել երբ Եկեղեցին
դժուարութիններ կը դիմագրաւէ, որպէսզի փախչի անոնցմէ, այլ ըսած է թէ պատասխանատուութեան
պահուն կարիքը կայ դիմագրաւելու ամէն տեսակի մարտահրաւէր: Իսկ հրաժարականը Եկեղեցւոյ
կեանքին մէջ յարաբերաբար հանդարտ պահու մը ընթացքին կու գայ: Եւ այդպէս ալ եղաւ:» Հայր
Վարդան Գազանճեան խօսելով Կաթողիկէ եկեղեցւոյ ներկայի իրավիճակին մասին ըսաւ ՝«Սուրբ
Աթոռին եւ Կաթողիկէ Եկեղեցւոյ ընդհանրապէս եւ Վատիկանի մասնաւորապէս կառավարումը այսօր
այնքան ալ հեշտ բան չէ: Եւ այս վերջին տասնեակներուն, մանաւանդ 90-ական թուականներէն
սկսեալ կարիքը զգացուած է ներքին եւ արտաքին վերանորոգման եւ նոր աշխատելաոճի անհրաժեշտութեան՝
Կաթողիկէ Եկեղեցւոյ կառավարման մէջ:»