Չորեքշաբթի 13 Փետրուարը ''Օր Մոխրոց է'' Ըստ Լատինաց։

Պենետիկտոս ԺԶ Սրբազան Քահանայապետը, չորեքշաբթի 13 փետրուարի առաւօտեան ժամը 10.30-ին՝ ընդհանուր ունկնդրութիւն կը շնորհէ բազմահազար հաւատացեալներուն, իսկ յետ միջօրէի ժամը 17­ին Վատիկանի Ս.Պետրոսի Տաճարին մէջ պիտի գլխաւորէ մոխրոց օրհնութեան արարողութիւնը։ ''Օր Մոխրոցը'' որով կը սկսի քառասնորդաց ծոմապահութեան շրջանը հաւատացեալներուն կ՛ուզէ յիշեցնել` երկրաւոր բարիքներուն ունայն եւ անցողական բնոյթը. Այդ օր Քահանան իւրաքանչիւր հաւատացեալի գլխուն վրայ կը սրսկէ պատրաստուած մոխիրը ըսելով. Յիշեա ով մարդ զի հող էիր եւ ի հող դարձցիս. Այսինքն Յիշէ ով մարդ թէ հող էիր եւ հող պիտի դառնաս։
Լատին եկեղեցւոյ համար Մեծ Պահքի տեւողութիւնը 40 օր է։ Եկեղեցիէն հաստատուած է որպէս պատրաստութիւն Քրիստոսի Չարչարանքի, Խաչելութեան, Մահուան եւ Փառաւոր Յարութեան։ Մեծ պահքին ընթացքին, հաւատացեալը հրաւիրուած է ապրելու այս շրջանը աղօթքով ծոմապահութեամբ եւ ողորմութեամբ։ Ծոմապահութիւնը կը կայանայ ինքզինք կերակուրէն զրկելու մէջ, հաւատացեալի տարիքին եւ առողջութեան համաձայն։ Խիստ պահեցողութիւնը երկու օր է, մոխրոց օրը եւ Աւագ Ուրբաթ օրը։