Kremtimi i Zojës së Lurdit në Katedralen Nënë Tereza në Vau-Dejës
Në nder të festës së Zojës së Lurdit, Ditës Ndërkombëtare të lutjes për të sëmurët,
më 11 shkurt 2013, Kisha Dioqezane e Sapës u mblodh në Katedralen Nënë Tereza në Vau-Dejës
për të bashkëkremtuar këtë ditë me Ipeshkvin e saj, Imzot Lucjan Avgustini dhe meshtarët
e tjerë të Sapës. Përveç besimtarëve të shumtë, të ftuar të veçantë ishin të sëmurët
shoqëruar nga pjesëtarët e familjeve të tyre, nga Motrat dhe meshtarët që shërbejnë
në famulli. Kisha gjithmonë i kushton një kujdes të posaçëm atyre që vuajnë në
vuajtjet e trupit dhe lutet për ta. Ndaj dhe sot me rastin e kësaj dite, Ati i Shenjtë
Papa Benedikti XVI dërgon mesazhin me titull: “Shko, e bëj edhe ti kështu”. Papa Benedikti
XVI thekson në këtë mesazh se “Kjo ditë është për të sëmurët, për punëtorët e shëndetit,
për besimtarët e krishterë, për të gjithë personat vullnet mirë “një moment i fortë
lutjeje, bashkëndarjeje, ofrimi të vuajtjes për të mirën e Kishës dhe një thirrje
për të gjithë për të njohur në fytyrën e të sëmurit Fytyrën e Shenjtë të Krishtit
që, duke vuajtur, duke vdekur e duke u ngjallur i ka sjellë shpëtimin njerëzimit.
Në këto kushte thekson Ati i Shenjtë, ndihem në mënyrë të veçantë afër secilit prej
jush, të dashur të sëmurë që në vendet e kujdesit ose në shtëpi, jetoni një moment
të vështirë prove për shkak të sëmundjes ose të vuajtjes”. Ndërkohë, Ipeshkvi
i vendit nga altari i Katedrales Nënë Tereza lëshoi thirrjen që të angazhohemi secili
për të jetuar Ungjillin në shërbim, duke e parë në të sëmurin vetë Jezu Krishtin.
Në këtë vit të fesë të cilin kemi filluar ta jetojmë tha ai përmes lutjeve dhe shtegtimeve
të ndryshme dioqezane, përbën një rast të përshtatshëm për të dendësuar diakoninë
e bamirësisë në bashkësitë tona kishtare, për të qenë secili samaritani i mirë ndaj
tjetrit, ndaj atij që na është afër. Gjatë këtij kremtimi secili besimtar u lut
për shëndetin e të sëmurëve, duke ia besuar ndërmjetësisë së Shenjtës Virgjërës Mari,
dhe duke i kërkuar që t’i shoqërojë ato në kërkim të ngushëllimit e të shpresës që
të mund ta përballojnë kryqin e jetës me dashuri si vetë Jezu Krishti. Pas tryezës
eukaristike, Caritasi Dioqezan i Sapës shtroi dhe një drekë vëllazërore për të gjithë
të sëmurët e pranishëm. Violeta Marashi