Sot, në Vatikan, një delegacion i Kazakistanit, në frymën e dialogut ndërfetar.
Sot, në Vatikan, ishte për vizitë një delegacion i Kazakistanit. Rasti: përkujtimi
i dhjetëvjetorit të Kongresit I ndërfetar të Astanës, organizuar nga presidenti i
Kazakistanit, Nazarbajev. Paradite delegacioni u takua me Atin e Shenjtë gjatë
audiencës së përgjithshme. Sillte me vete mbresat e paharruara të shtegtimit apostolik
të Gjon Palit II në këtë vend, në shtator të vitit 2002, shkruar në kujtesën e popullit
të Kazakistanit. Ishte, kjo, një vizitë nën shenjën e dialogut e të paqes, pak ditë
pas atentateve të 11 shtatorit në SHBA. Duke shfletuar faqet e historisë më të re
të vendit, lexojmë një ngjarje tjetër të rëndësishme: audiencën, në të cilën Papa
Benedikti XVI priti presidentin Nazarbajev, më 6 nëntor 2009. Në Kazakistan, vend
me shumicë myslimane, të krishterët arrijnë në 2% të popullsisë, por gjithsesi, gëzojnë
më shumë liri fetare se në vendet e tjera aziatike. Pikërisht mbi gjendjen aktuale
të kësaj lirie, bazë për të gjitha liritë e tjera, flet, në mikrofonin tonë, imzot
Khaled Akasheh, anëtar i Këshillit Papnor për Dialogun Ndërfetar:
Përgjigje:
- Lidhur me temën e lirisë fetare duhen theksuar prirje shumë pozitive, për shembull,
lëshimi i trojeve për ndërtimin e kishave, ndërtimi i vendeve të kultit për bashkësitë
e ndryshme fetare, dhënia, pa vështirësi, e vizave për personelin fetar, lëvizja
e lirë brenda vendit për priftërinjtë dhe ipeshkvijtë. E theksojmë këtë, sepse, siç
e dimë, në vende të tjera kjo lëvizje është e kufizuar. Por nuk mungojnë as problemet,
si ai i vënies së shenjës të barazimit ndërmjet kombësisë e fesë. Mendohet se të gjithë
polakët janë katolikë, të gjithë gjermanët, protestantë, të gjithë kazakët, myslimanë….
Po kjo nuk përkon fare me të vërtetën e, natyrisht, as me lirinë fetare, nënkuptuar
edhe si liri a mundësi për të ndërruar fenë.
Pyetje: - E për dialogun
ndërfetar, ç’mund të na thoni?
Përgjigje: - Kazakistani është i vetmi
vend në Azinë qëndrore, që merr nisma me këto përmasa, si Kongresi ndërfetar, që tashmë
ka arritur në edicionin e katërt, me pjesëmarrje të delegacioneve nga vende të ndryshme,
me qindra vetë. Kjo platformë takimi ndërmjet prijësve fetarë në një zonë të rëndësishme,
e aspak të lehtë nga pikëpamja fetare dhe ajo e sigurisë, është një pikë në favor
të tyre.
Kujtojmë se pas takimit me Papën, paradite, pasdite delegacioni kazak
mori pjesë në një takim pranë Këshillit Papnor për Dialogun ndërfetar. Takimi pëfundoi
me darkën miqësore, organizuar nga ambasada e Kazakistanit pranë Selisë Apostolike.