Арцыбіскуп Фізікела: моц сведчання св. Пятра ў мастацкіх творах – шлях новай евангелізацыі
Выстава “Шлях св.Пятра”
адкрываецца ў замку св. Анёла ў Рыме 7 лютага і будзе даступна для шырокай публікі
да 1 мая гэтага года. На ёй змешчаны святыя карціны апостала, які даў наймацнейшае
сведчанне веры і адданасці Хрысту. Экспанаты прыбылі ў Рым з 9 краін свету і датуюцца
ад ІV да ХХ стагоддзя. Запал веры св. Пятра, на якім Езус заснаваў Касцёл, “мастакі
здолелі занатаваць і выявіць з уласцівай ім геніяльнасцю ў многіх творах, вызначаных
прыгажосцю”,- адзначыў на прэс-канферэнцыі 5 лютага арцыбіскуп Рына Фізікела, старшыня
Папскай рады па новай евангелізацыі. На яго думку, роздум над таямніцай прыгажосці
– гэта водгук на тугу аб Богу, якая жыве ў чалавеку. "Вера – заданне не толькі для
вернікаў; яна выяўляе патрэбу чалавека зірнуць ўнутр сябе",-сказаў арцыбіскуп. У часы,
занураныя ў стомленасць і раўнадушша, мільёны людзей працягваюць радавацца як прыгажосці
прыроды, так і творам музыкі, архітэктуры, жывапісу.Таксама і сёння чалавек не жадае
ўпасці, “па закліках новых сірэн, у эфімерныя ілюзіі, марнатраўства часу ў вялым хаджэнні
па сотнях крам, дзе па нізкіх цэнах прадаецца ілюзія шчасця”, - адзначыў іерарх. Ён
сцвердзіў, што ў сэрцы кожнага чалавека жыве прага Бога.
"Мы задумалі арганізаваць
гэтую выставу як падарожжа па стагоддзях, каб пазнаёміць з адным з персанажаў, які
заўсёды правакаваў розум мастакоў ў жаданні зразумець таямніцу. Гэта – сапраўдны шлях
веры, які натхняе мастакоў для аб’яўлення пакаленням усіх людзей на зямлі Добрай
Весткі",-сказаў арцыбіскуп Фізікела і дадаў, што гэта выстава адкрывае цэлы шэраг
разнастайных міжнароднах культурных мерапрыемстваў у Годзе веры для лепшага правядзення
новай евангелізацыі.