“Porta e fesë” është gjithnjë e hapur: mbajeni gjallë flakën e ‘dashurisë së parë’!
“Porta e fesë” është përherë e hapur. Në Ditën XVII botërore të Jetës Rregulltare,
Papa kryesoi, në Bazilikën e Vatikanit, Meshën Shenjte, kushtuar pikërisht këtij kremtimi.
Përfaqësuesve të Instituteve të Jetës së Përkushtuar e të Shoqërive të Jetës Apostolike,
u drejtoi tri ftesa që, tha Papa, të mund të hyjnë plotësisht në atë “Portë të fesë”,
e cila është gjithnjë e hapur për ne. Në radhë të parë, ftesa për ta mbajtur
ndezur flakën e fesë, që të mund të ndriçojnë kështu botën me thirrjen e tyre. Prej
këndej, ftesa tjetër, për të kujtuar, përmes shtegtimit shpirtëror, dashurinë e parë,
me të cilën Jezusi ua ngrohu zemrat. E kjo, jo për nostalgji, por për të ushqyer flakën
e fesë. Në vijim, Benedikti XVI i ftoi përfaqësuesit e Jetës së Përkushtuar ta
kultivojnë fenë, që është e aftë të pranojë edhe dijen e ligështisë. Në gëzimet e
mjerimet e kohës së sotme, kur barra e kryqit ndjehet fort, e dhemb fort, tha Papa,
mos dyshoni se ‘kenosi’ i Krishtit është flija e Pashkëve. Pikërisht në limitin e
në ligështinë njerëzore, jemi të thirrur ta jetojmë njësimin me Krishtin, në një tension,
i cili na pushton plotësisht e i paraprin, në atë masë që lejon jeta në kohë, përkryerjes
eskatologjike. Në shoqëritë, që vlerësojnë mbi të gjitha aftësinë për punë, fitimin,
suksesin, jeta juaj e kaluar nën hije, nën shenjën e ligështisë e të vogëlsisë së
atyre, që nuk kanë zë, theksoi Papa, bëhet shenjë ungjillore kundërvëniejeje. Risimi
i fesë, nënvizoi Ati i Shenjtë, ju bën shtegtarë drejt së ardhmes. Papa kujtoi,
në Ditën e jetës së përkushtuar, edhe se shëlbimi, që Jezusi i sjell popullit të
vet e që e mishëron në vetvete, kalon përmes kryqit, përmes vdekjes mizore, të cilën
Ai e mund dhe e shndërron në flije të jetës, për dashurinë. Kjo flije paralajmërohet
plotësisht në gjestin e Paraqitjes në Tempull, gjest natyrisht i kryer sipas traditave
të Besëlidhjes së Vjetër, por i frymëzuar thellësisht nga feja e përkryer e nga dashuria,
që përkon me plotësimin e kohëve, me praninë e Hyjit e të Shpirtit të tij të Shenjtë
në Jezusin.