DBR-së: Atë Kiera: ‘meninos de rua” e presin Papën me padurim.
Në Rio-de-Zhanéjro vijojnë përgatitjet për DBR-së, që do të mbledhë, në qytetin brazilian,
të rinj nga mbarë bota për takimin me Papën. Pritje, padurim. E me të njëjtin padurim
e presin Atin e Shenjtë edhe “të rinjtë e përjashtuar”, fëmijët e rrugës, siç nënvizon
Atë Renato Kiera, themelues i Shtëpisë do Menor, në Rio-de-Zhanejro:
Përgjigje:
- Pritja është shumë e madhe, e ne do të ishim shumë të kënaqur në se Papa
do të takohej me këtë rini, me rininë e përjashtuar, më të përjashtuarën nga radhët
e shoqërisë, atë që shkon në “crackolandie”, që merret me trafikun e drogës, për të
pasur një farë vlere, për të qenë e dukshme, për t’i treguar botës se është ende në
jetë. Prandaj ne dëshirojmë shumë që Ati i Shenjtë, i cili ua hap zemrën të rinjve,
i do të rinjtë, të mendonte edhe për një takim me ta. E ne ëndërrojmë që të rinjtë
e “Shtëpisë do menor”, përfaqësues të kësaj pjese të rinisë, adoleshentët e padashur
e të përjashtuar, të mund t’i japin një përqafim Papës.
Pyetje: -
Kur Papa ishte në Brazil, më 2007, në Fazenda da Esperança, takoi fëmijët: ishte një
çast që mbarë Brazili vijon ta kujtojë edhe sot e kësaj dite me gëzim e emocion... Përgjigje:
- Unë ia pata dhënë këtë ide atyre të Frei Hans (themelues i Fazenda da
Esperança). U pata thënë: “Shiko, kujtojani Papës se mund të takohet edhe me fëmijët.
Organizoni një takim, që ata të mund të arrijnë tek ai e ta përqafojnë. E ky përqafim
i bëri mirë edhe Atit të Shenjtë. Ëndërrojmë që edhe djemtë tanë ta përqafojnë Benediktin
XVI: o gjatë Meshës, ose sapo të arrijë. Nuk kërkojmë më shumë: vetëm një përqafim!
“Gen rosso” i Lopianos, i Lëvizjes së Fokolarëve, dëshiron të përgatisë një shfaqje
me të rinjtë e përjashtuar. Prej këndej, po kërkojnë të rinjtë e rrugës, të rinjtë
e “Shtëpisë do menor”, të “Fazenda da Esperança” dhe të rinj, që janë në burg. E do
të dëshironin të organizonin një shfaqje me 200 prej tyre, 40 nga ‘Shtëpia do menor’.
Ne kemi nisur përgatitjet: djemtë janë shumë të kënaqur dhe e ndjejnë veten shumë
të nderuar, që janë thirrur të përgatisin shfaqje për Papën. Jezusi do të kishte
ardhur mes tyre, sepse Ai i kërkon, i do të përjashtuarit. E ne, që jemi ‘Shtëpia
do menor’, pra, e të vegjëlve, do të jemi përvujtërisht të kënaqur, si për Papën,
ashtu edhe për të rinjtë tanë. Jam i sigurtë se kjo do të ishte një ngjarje e paparë,
shumë e bukur. Figurë e paharrueshme. Kur shikohet Ati i Shenjtë që përqafon e përqafohet,
kjo nuk mund të mos e emocionojë mbarë botën.