Кардынал Марк Уэлле,
прэфект Кангрэгацыі па справах Біскупаў, падкрэсліў важнасць і значэнне для кожнага
біскупа візітаў “ad limina Apostolorum”. Ён лічыць, што сістэматычныя падарожжы епіскапатаў
у Рым сведчаць аб паўсюднасці Касцёла. Праз сустрэчу біскупа з Папам узмацняецца еднасць
і калегіяльнасць паміж епіскапатамі і Наступнікам св. Пятра, а сам Касцёл яднаецца
ў камуніі і місійным парыве, звярнуў увагу ватыканскі іерарх. Ён падкрэсліў важнасць
асабістага дыялогу са Святым Айцом, калі кожны біскуп прывозіць з сабой тое, чым жыве
ён і яго дыяцэзія: радасць, боль, надзеі і цярпенні, і кожны адчувае падтрымку Папы.
Кардынал-прэфект адзначыў, што сёння такая падтрымка патрэбна перш за ўсё
біскупам Блізкага Усходу, Афрыкі і іх супольнасцям. Святы Айцец падчас сваіх шматлікіх
сустрэч з іерархамі з усяго свету падкрэслівае, што Касцёл мае права выконваць сваю
місію не толькі на ўзроўні літургіі, але і праз культурныя, адукацыйныя, дабрачынныя
ініцыятывы. Кардынал Уэлле прызнаўся, што ў размовах з ім, біскупы падкрэсліваюць
сардэчнасць і зацікаўленне Бэнэдыкта XVI сітуацыяй у дыяцэзіях на ўсім свеце. Святы
Айцец сваім уменнем слухаць дае прыклад, наколькі слуханне дапамагае Касцёлу на яго
шляху.