Përshëndetja e Papës shtegtarëve italianë: të punohet për një kulturë të fortë fetare
Në përfundim të audiencës së përgjithshme, Papa përshëndeti shtegtarët italianë, ndërmjet
të cilëve, edhe ipeshkvijtë, miq të Lëvizjes së Fokolarëve. Duke iu drejtuar besimtarëve
të ardhur nga Potenca, kryesuar nga ipeshkvi i tyre, imzot Agostino Superbo, Ati i
Shenjtë nënvizoi se nuk duhet kursyer asnjë përpjekje që besimtari, si i qytetit,
ashtu edhe i fshatit, të pajiset me një kulturë të fortë fetare. Vetëm kështu të gjithë
do të kenë përgatitjen e duhur për t’i marrë me fryt Sakramentet, ushqim i domosdoshëm
për rritjen në fe. Por, ta dëgjojmë vetë Papën: “U drejtoj përshëndetjen
time të përzemërt shtegtarëve të gjuhës italiane. Posaçërisht, përshëndes Ipeshkvijtë,
miq të Lëvizjes së Fokolarëve. Të dashur Sivëllezër, së bashku me ju, përshëndes edhe
të gjithë ata, që do të marrin pjesë në takimet e organizuara në disa vende të botës.
Duke ju siguruar për lutjen time, uroj që karizma e unitetit, aq e dashur për ju,
t’ju ndihmojë e t’ju frymëzojë në misionin tuaj apostolik. Përshëndes besimtarët
e Potenca-Muro Lukano-Marsikonovo, të shoqëruar nga bariu i tyre, Imzot Agostino Superbo.
Të dashur miq, përpiquni me të gjitha forcat që besimtari, si i qytetit, ashtu edhe
i fshatit, të pajiset me një kulturë të shëndoshë fetare. Vetëm kështu të gjithë do
të kenë përgatitjen e duhur për t’i marrë me fryt Sakramentet, ushqim i domosdoshëm
për rritjen në fe. Prania në këtë takim e autoriteteve të Bazilikatës, të cilëve
u drejtoj një përshëndetje të posaçme, më krijon rastin t’u shpreh mirënjohjen time
të gjithë atyre, që punuan me pasion për realizimin e Shpellës aq të bukur të Betlehemit,
vendosur në këtë Shesh, admiruar nga një mori shtegtarësh, si shprehje e artit lukan. U
drejtohem, në përfundim, të sëmurëve e të sapomartuarve. Kremtohet nesër festa liturgjike
e Shën Gjon Boskos, prift e edukator. Merrni shembull nga ai, të dashur të rinj, sepse
ishte mësues i vërtetë jete. Ju, të dashur të sëmurë, mësoni nga përvoja e tij
shpirtërore për ta lëshuar vetveten, në çdo rrethanë, në dorë të Krishtit të kryqëzuar. E
ju, të dashur të sapomartuar, kërkoni ndërmjetësimin e tij, për ta jetuar me impenjim
bujar misionin si bashkëshortë e si prindër.