Ліванскі кардынал напіша разважанні да Крыжовага Шляху ў Калізеі
Мараніцкі Патрыярх,
кардынал Бешара Бутрас Раі, падрыхтуе тэксты сёлетняга Крыжовага Шляху ў рымскім Калізеі,
які пройдзе ў Вялікую Пятніцу з удзелам Бэнэдыкта XVI. Святы Айцец, давяраючы напісанне
разважанняў блізкаўсходняму іерарху, пажадаў такім чынам узгадаць сваё мінулагодняе
падарожжа ў Ліван і запрасіць хрысціян да малітвы за сваіх братоў і сясцёр на Блізкім
Усходзе. Хрысціяне ў рэгіёне сутыкаюцца са шматлікімі праблемамі.
Медытацыйныя
тэксты будуць прачытаны 29 сакавіка пры сабранні некалькіх тысяч асоб у месцы мучаніцтва
першых хрысціян. У антычным Калізеі Святы Айцец і вернікі будуць разважаць на 14 стацыямі
мукі і смерці Хрыста.
72-гадовы кардынал Раі з 2011 г. з’яўляецца Патрыярхам
Мараніцкай Царквы, у Калегію кардыналаў ён быў залічаны ў лістападзе мінулага году.
Апостальскае падарожжа Святога Айца ў Ліван праходзіла 14-16 верасня 2012 г. Нагодай
да візіту стала падпісанне паслясінадальнай апостальскай адгартацыі, якая стала вынікам
Сіноду Біскупаў для Блізкага Усходу.