Մեծի Տանն Կիլիկիոյ Կաթողիկոսութիւնը Կը Մասնակցի «Եկեղեցւոյ Միութեան Շաբթուան» Արարողութիւններուն
Միջեկեղեցական շարժումին նախաձեռնութեամբ` երկար տարիներէ ի վեր յունուար ամսուան վերջին
շաբաթը նուիրուած է եկեղեցւոյ միութեան: Այս շաբթուան ընթացքին աշխարհի բոլոր կողմերը
տեղի կ՛ունենան յատուկ արարողութիւններ, դասախօսութիւններ եւ զանազան ձեռնարկներ, որոնց
ընթացքին կարեւորութեամբ կը շեշտուի եկեղեցւոյ միութեան հրամայականը: Լիբանանի մէջ
«Եկեղեցւոյ միութեան շաբթուան» բացումը կատարուեցաւ կիրակի, 20 յունուար 2013-ին, Պէյրութի
ասորի կաթողիկէ եկեղեցւոյ մէջ տեղի ունեցած եկեղեցական արարողութեամբ: Արարողութեան ներկայ
գտնուեցաւ նաեւ վեհափառ հայրապետը: «Եկեղեցւոյ միութեան շաբթուան» նուիրուած ձեռնարկներուն
փակումը տեղի պիտի ունենայ Անթիլիասի Մայր տաճարին մէջ` կիրակի, 27 յունուար 2013-ի երեկոյեան
ժամը 6-ին տեղի ունենալիք եկեղեցական յատուկ արարողութեամբ: