Моцным момантам “духоўнага”
экуменізму назваў сёлетні Тыдзень малітваў за адзінства хрысціян кс. Фэдэрыка Ламбардзі
на хвалях Ватыканскга радыё. Ён лічыць, што гэта ініцыятыва надае сэнс і наталяе ўсе
іншыя экуменічныя ініцыятывы самага рознага ўзроўню і важнасці: тэалагічныя, культурныя,
дабрачынныя, грамадскія. “Усе яны неабходныя і каштоўныя, але натхняе і спалучае іх
толькі малітва да Езуса, якая зыходзіць з глыбіні душы, аб адзінстве ўсіх тых, хто
верыць у Яго”, - перакананы прадстаўнік Святога Пасаду.
Кс. Ламбардзі ўзгадаў
постаць заснавальніка супольнасці ў Тэзэ брата Ражэ. “Мы павінны пачуць знутры яго
экуменізм, пражыты духоўна, і даць яму кіраваць намі”, - сказаў кіраўнік Залы Друку.
Ён нагадаў аб Еўрапескай сустрэчы моладзі, якая праходзіла ў Рыме ў навагоднія дні
пад эгідай супольнасці ў Тэзэ і спатканні яе ўдзельнікаў з Папам на плошчы св. Пятра.
“І каго хвалявала ў гэты вечар, да якой канфесіі належыць кожны з гэтых маладых людзей?”,
- задаў рытарычнае пытанне кс. Ламбардзі і адказаў, што ўсе належалі Духу, дадзенаму
Хрыстом. “Будзем працягваць маліцца і спадзявацца на адзінства”,- заклікаў прадстаўнік
Святога Пасаду.