Кардынал Дзяржсакратар: судовыя функцыі – частка евангелізацыі
“Судовыя функцыі,
па сваёй сутнасці, не выходзяць за рамкі евангелізацыйных абавязкаў Касцёла, гэта
жывая частка яго збаўчай місіі”, - лічыць кардынал Дзяржсакратар Тарчызіо Бэртонэ.
Ён узначаліў 26 студзеня св. Імшу на распачацце судовага году ў Трыбунале Рымскай
Роты. Прававыя і душпастырскія аспекты дзейнасці Касцёла вельмі цесна звязаны паміж
сабой, перакананы іерарх. “Гэта іх гармонія вынікае з агульнай мэты: збаўлення душы”.
“Было б немагчымым прывесці душы ў Нябеснае Валадарства не прымаючы сувязі паміж міласэрнасцю
і разважлівасцю, якія павінен ажывіць абавязак добрасумленна выконваць закон і захоўваць
правы кожнага чалавека ў Касцёле”, - падкрэсліў кардынал Бэртонэ.
Найбліжэйшы
супрацоўнік Папы лічыць, што адным з заданняў суддзяў Трыбуналу Рымскай Роты з’яўляецца
пераадоленне недаверу і імкненне “заваяваць сэрцы тых, хто прадузята і варожа настаўлены”
да Касцёла. “Толькі са спакоем у сэрцы можна дасягнуць духоўнай пакоры, неабходнай
для тлумачэння законаў паводле крытэрыяў справядлівасці і праўды”, - адзначыў ён і
нагадаў, што ў сённяшнім свеце, адзначаным войнамі і разбуранымі нянавісцю і злосцю
сям’ямі, кожны чалавек звяртаецца да Касцёла “за мірам і справядлівасцю Божай у Хрысце
Езусе”. Кардынал Дзяржсакратар пажадаў касцёльным суддзям дару мудрасці і інтэлекту,
каб пастаянна кіравацца “сапраўднай евангельскай логікай, адзіным крытэрыем суджэння
паводле праўды і любові”.