“Tobin tax” në 11 vende evropiane. Nga Forumi i Davosit: ekonomia do ta ngrejë kryet
në gjysmën e dytë të vitit
“2012-a do të kujtohet në histori si viti i rizgjimit të euros, ndërsa 2013-a do të
jetë viti i përmirësimit ekonomik, por vetëm në semestrin e dytë”: ky mesazh optimizmi
të moderuar u dha nga presidenti i Bankës Qendrore Evropiane, në Forumin ekonomik
të Davosit, që u zhvillua kësaj jave. Por fjala është për tregjet financiare, pasi
këto prirje pozitive akoma nuk i janë transmetuar ekonomisë reale. Ndërkaq, 11
vende evropiane do të vendosin të ashtuquajturën “Tobin tax”, taksën, që bankat do
të paguajnë për çdo transaksion financiar. Ajo e merr emrin nga Çmimi Nobel për ekonominë,
Xhejms Tobin, i cili e pati propozuar në vitin 1972. Por si gjithnjë, kundërshton
Britania e Madhe e pikërisht në Forumin e Davosit, kryeministri Kamerun lajmëroi se
pas vitit 2015, do të organizojë një referendum, me të cilin anglezët të zgjedhin
nëse duan të bëjnë pjesë akoma në Bashkimin Evropian. Por cilat do të ishin pasojat
e daljes së Londrës nga 27-shja? Të dëgjojmë opinionin e ekonomistit italian, Xhovani
Marseguerra: Pasojat e daljes së Londrës nga Bashkimi Evropian nuk mund të
vlerësohen me saktësi. Ekzistojnë precedente të ndryshme historike. Sigurisht, pas
vendimit të Kamerunit, qëndron loja e ndërlikuar e rishikimit të Traktateve. Nëse
Londra mendon ta kushtëzojë pranimin e rishikimit të Traktateve - që janë të nevojshme
për të shpëtuar Bashkimin Evropian - nga dhënia e një pushteti më të madh për Britaninë
e Madhe, mendoj se mund të krijojë krisje në ndërtesën evropiane. Pra, rrezikon të
mos shkojë drejt një Evrope më të fuqishme, siç dëshiron kryeministri Kamerun.