Imzot Çeli: Papa në social network është gati të hyjë në dialog me të gjithë botën.
Në konferencën e shtypit, gjatë së cilës u paraqit Mesazhi i Papës për ditën e 47-të
Botërore të Komunikimit, imzot Klaudio Maria Çeli, kryetar i Këshillit Papnor për
Komunikimet Shoqërore, ripohoi se është e nevojshme që Benedikti XVI të “banojë”,
thënë simbolikisht, në network e posaçërisht në Twitter, pavarësisht nga disa kritika,
që i janë drejtuar në internet. Ftesa është një dhe e fortë: të ripropozohen mesazhet
e Atit të Shenjtë gjë që - tha imzot Çeli - tashmë e bën 7% e ndjekësve. E kjo përqindje
ka prirjen të rritet çdo ditë. Është Twitter-i mjedisi ‘institucional’, në të cilin
Papa duhet të jetë, pavarësisht se në të kaluarën ka pasur edhe fyerje e komente negative
në drejtim të Benediktit XVI: “Nuk jemi zënë në befasi. Kur hyn në këtë mjedis,
nuk mund ta mohoj, mund të gjesh gjithçka. Nga njëra anë kemi pasur mesazhe të shkëlqyera,
e nga ana tjetër, edhe fyerje, formula, që ironizonin disa gjëra. Provuam pakënaqësi
edhe përballë një fenomeni të tillë, por thamë: nëse duam të hyjmë në dialog me njeriun
e sotëm e në këtë mjedis, duhet ta pranojmë edhe rrezikun. Pra, sot po e përballojmë
pikërisht këtë rrezik. Gjithsesi mendoj se është më mirë të jesh gjithnjë më i pranishëm,
sesa të mos jesh, për ta shmangur rrezikun”. Rrezik, pra, i parashikuar me
mendimin se duhet përballuar, ndonëse edhe me përpjekje për t’i vënë fre fenomenit,
tha imzot Çeli. Twitter është realitet laik; disa reflektime u mirëpritën, të tjera,
jo, por nuk menduam asnjëherë të kthehemi mbrapa: “Ky është kuptimi i Mishërimit.
Zoti im, pikërisht në çastin kur i dhuronte njerëzimit gjithë vetveten, u tall, u
poshtërua. Po ai nuk dredhoi rrugë. Përkundrazi, e pranoi flijimin deri në fund të
fundit. Mendoj, prandaj, se është kjo përmasa e pranisë së Papës në Twitter e në Facebook.
Kur njeriu endet nëpër shkretëtirë, edhe një pikë vese i bën mirë zemrës së zhuritur”.