Xhamia e re e Ethem Beut në Tiranë do të jetë xhamia e të gjithë shqiptarëve, tha
kryeministri i Shqipërisë, Sali Berisha, gjatë një takimi të zhvilluar më 17 janar
në kryeministri me Kreun e Komunitetit Mysliman të Shqipërisë, Haxhi Selim Muça. Lajm
u bën i ditur nga zyra e shtypit të kryeministrisë së Tiranës me anë të një njoftimi
për shtyp. Sipas njoftimit, Kreu i ekzekutivit, duke folur për Xhamin e re në kryeqytet,
u shpreh optimist për avancimin e procedurave për ndërtimin e xhamisë së madhe të
Tiranës. Berisha gjithashtu vlerësoi me kënaqësi, që ka filluar puna e projektimit
të kësaj xhamie, që do të ngrihet në vendin tradicional dhe historik të Namazgjasë. "Ajo
jo do të jetë xhamia e të gjithë shqiptarëve dhe një monument i shkëlqyer i arkitekturës
islame, që do të mishërojë edhe traditën e gjatë dhe origjinale të xhamive shqiptare.
Duhet të kujtoj me këtë rast se hapja e xhamisë së Ethem Beut në Tiranë për shërbimet
fetare ka qenë një nga veprimet e para të Partisë Demokratike," u shpreh Kryeministri
i Shqipërisë. Kryeministri Berisha e siguroi zotin Haxhi Selim Muça se qeveria
do të marrë të gjitha masat dhe do të japë të gjithë mbështetjen që punimet për xhaminë
e re të fillojnë në muajin mars. Kryetari i Bashkisë së Tiranës, Lulzim Basha,
që mori pjesë në takim, e garantoi Haxhi Selim Muça për përfundimin e shpejtë të procedurave
të dhënies së lejes së ndërtimit, sapo projekti të jetë dorëzuar. Në takim mori
pjesë edhe drejtori i Fondacionit Sema, Mustafa Oxhan, i cili është një nga financuesit
e këtij ndërtimi. Haxhi Selim Muça shoqërohej nga arkitekti i xhamisë, nga nënkryetarët
e Komunitetit Mysliman Shqiptar, Bujar Spahiu dhe Gazmend Aga, si dhe kancelari Ali
Zaimi.(nga ATSH-ja)