Патрыярх Александрыйскі хоча працаваць на карысць прымірэння ў Егіпце

Новаабраны Патрыярх Александрыйскі Ісаак Ібрагім Сідрак падзяліўся праблемамі, якія стаяць перад католікамі краіны, і якія яны могуць вырашыць толькі ў супрацоўніцтве з Копцкай Праваслаўнай Царквой. Паводле іерарха, католікі Егіпта павінны працаваць для паяднання і міру ў краіне. Ён лічыць, што нядаўні выбар Тавадраса ІІ кіраўніком праваслаўных коптаў з’яўляецца моцным знакам ад Бога, запрашаючым хрысціян да адзінства, і вялікай надзеяй для Егіпта. “Мы сумесна будзем адказваць на складаныя выклікі, якія стаяць перад намі”, - сказаў Патрыярх Сідрак. Іерарх не згодны з меркаваннем тых, хто сцвярджае, што Егіпет стаў краінай, дзе хрысціяне не могуць працягваць жыць. Ён адзначыў, аднак, негатыўны ўплыў некаторых краін Персідскага Заліву і Аравіі, што можа прывесці да скажэння традыцыйнага аблічча егіпецкага іслама. “Гэтага баяцца не толькі хрысціяне, але і шматлікія мусульмане”, - прызнаўся новы кіраўнік Копцка-Каталіцкай Царквы.

На думку іерарха, у апошнія гады таксама хрысціянам стала ўласцівай “сектанцкая логіка”: яны пачалі замыкацца ўнутры сваіх супольнасцяў і ствараць паралельны з існуючым свет. Некаторыя хрысціянскія лідэры, напрыклад, пачалі заклікаць не мець ніякіх кантактаў з мусульманамі, бо гэта, на іх думку, можа быць небяспечна, паведаміў Патрыярх. Такім чынам можна згубіць свабоду і адкрытасць, характэрныя для вучняў Хрыста, якія не павінны баяцца страціць сваю веру па віне іншых, патлумачыў іерарх, гаворчы аб перспектывах сваёй дзейнасці на пасадзе Патрыярха Александрыйскага.