Бэнэдыкт XVI: дабрачынныя арганізацыі павінны праяўляць пільнасць і крытычны падыход
Святы Айцец сустрэўся
19 студзеня з удзельнікамі пленарнай асамблеі Папскай рады “Cor Unum”. Папа нагадаў
аб сціслай сувязі, якая існуе паміж любоўю і ісцінай, верай і міласэрнасцю. Паводле
яго, быццё хрысціянінам “атрымлівае свой сэнс ад веры, як сустрэчы з любоўю Хрыста,
Які прапануе новы гарызонт і надае вырашальны напрамак жыццю”. “Фундамент і форма
хрысціянскай любові – гэта вера”, - перакананы Бэнэдыкт XVI. Менавіта ў гэтым адметнасць
хрысціянскай дабрачыннасці – грунтуючыся на прынцыпах веры, яна дэманструе “пункт
гледжання Бога”, яго праект адносна чалавека. У кожную эпоху, калі чалавек не прымаў
гэтага праекту, ён станавіўся ахвярай і нявольнікам “культурных спакус”, заўважыў
Папа. Тут ён узгадаў ідэалогіі апошніх стагоддзяў, якія прапаведвалі культ нацыі,
расы, а таксама агрэсіўны капіталізм “з яго культам прыбытку, наступствам якога сталі
крызісы, няроўнасць і беднасць”. Гэта ўсё падштурхоўвае сучасных хрысціян да працы
“на карысць сапраўднай цывілізацыі, цывілізацыі любові”, адзначыў Святы Айцец.
Бэнэдыкт
XVI з непакоем заўважыў, што і наш час, на жаль, “ведае негатыўныя праявы, якія кідаюць
цень на Божы план. У сучасным свеце ўсё яшчэ раздаецца рэха “старажытнага геданістычнага
матэрыялізму” спалучанага з “тэхналагічным праметэізмам”. “Ад саюза паміж матэрыялістычным
погляд на чалавека і вялікім развіццём тэхналогій узнікае антрапалогія ў сваёй сутнасці
атэістычная”, - заўважыў Пантыфік. Яе небяспека ў тым, што чалавек у ёй “зводзіцца
да аўтаномных функцый”; ён, пазбаўлены душы, асабістых адносін са Створцам, можа дазволіць
сабе на любыя эксперыменты. У такой сітуацыі, “усё, што тэхнічна магчыма, становіцца
законным, кожны эксперымент з’яўляецца прымальным, любая палітыка ў галіне народанасельніцтва
дазволенай, любыя маніпуляцыі ўзаконенымі”, - заўважыў з занепакоенасцю Папа. Самым
небяспечным у гэтым усім з’яўляецца “абсалютызацыя чалавека”, тое, што “чалавек хоча
быць абсалютам, вызваленым ад любога закону і любой натуральнай канстытуцыі”, - падкрэсліў
Бэнэдыкт XVI. Гэта радыкальнае адмаўленне з боку чалавека яго “створанасці і сыноўства”
заканчваецца драматычнай адзінотай апошняга, заўважыў Папа.
Святы Айцец падкрэсліў,
што каталіцкія дабрачынныя арганізацыі павінны праяўляць пільнасць і здаровы крытычны
падыход, і адмаўляцца ад фінансавання і партнёрства з тымі, хто не прымае хрысціянскай
антрапалогіі, якая палягае на пашане годнасці асобы і яе сціслай камуніі з Богам,
на прызнанні ўнікальнасці кожнага чалавека.
Бэнэдыкт XVI падзякаваў прадстаўнікам
дабрачынных арганізацый з усяго свету за іх дзейнасць, падставай якой з’яўляецца намаганне
захаваць або вярнуць годнасць кожнага чалавека.