2013-01-17 12:47:39

Վրաստանի Վարչապետ Իվանիշվիլի Հայաստանի Մէջ։


Հայաստանի ու Վրաստանի կառավարութեան ղեկավարներու այսօր տեղի ունեցած առանձին հանդիպումէն ետք լրագրողներու հետ հանդիպման ընթացքին` Վրաստանի վարչապետ Պիձինա Իվանիշվիլի յայտարարած է, թէ հանդիպումը անցած է շատ ջերմ: Ասիկա Վրաստանի Վարչապետի այս տարուան առաջին օտարերկրեայ այցն է:
Երեւանի մէջ նախատեսուած են Վրաստանի վարչապետի հանդիպումները ՀՀ նախագահ Սերժ Սարգսեանի, ՀՀ վարչապետ Տիգրան Սարգսեանի, Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի, ինչպէս նաեւ ՀՀ արտաքին գործերու , ուժանիւթի եւ բնական պաշարներու եւ տնտեսութեան նախարարներու հետ: Պիձինա Իվանիշվիլի պիտի այցելէ Ծիծեռնակաբերդ` յարգանքի տուրք մատուցելու Հայոց Ցեղասպանութեան զոհերու յիշատակին, ան նաեւ պիտի այցելէ Մատենադարան:
Երեւանի մէջ գտնուող Վրաստանի Վարչապետին, հայ լրագրողները հարց տուած են, թէ ինչ ակնկալիքներ կրնայ ունենալ հայ համայնքը Վրաստանի կառավարութենէն, քանի որ Վրաստանի մէջ ապրող բազմաթիւ հայերու մեծ մասը քուէարկած է «Վրացական Երազանք»-ի եւ անոր նախընտրական ծրագիրի օգտին:
«Վրաստանի կառավարութիւնը ամէն ինչ պիտի ընէ, որ այնտեղ ապրող հայութիւնը ինքզինք զգայ իր հայրենիքին մէջ: Պիտի ընեմ ինչ որ խոստացած եմ նախընտրական ծրագիրով»( ըսած է Վրաստանի Վարչապետը) :








All the contents on this site are copyrighted ©.