Ватыканскі іерарх: хрысціяне Блізкага Усходу павінны застацца там, дзе нарадзіліся
Кардынал Леанарда
Сандры, прэфект Кангрэгацыі па справах Усходніх Касцёлаў у інтэрв’ю “Corriere della
Sera” заявіў, што вызнаўцы Хрыста з усяго свету павінны бараніць права хрысціян Блізкага
Усходу жыць там, дзе яны нарадзіліся. Паводле іерарха, толькі аб’яднаўшыся з вызнаўцамі
іншых рэлігій, хрысціяне змогуць унесці свой станоўчы ўклад у мірнае вырашэнне праблем
і мір у гэтым рэгіёне. “Але вызнаўцы Хрыста павінны мець магчымасць жыць у бяспецы,
рэальнай свабодзе, уключаючы рэлігійную, з перспектывамі на будучыню, у прыватнасці,
моладзь”, - адзначыў старшыня ватыканскай дыкастэрыі і дадаў, што ў адваротным выпадку
маладыя людзі пачнуць эміграваць, што было б глыбокай ранай для краін Блізкага Усходу.
Гаворачы
аб сітуацыі ў Егіпце, які нядаўна наведаў, кардынал Сандры адзначыў, што яна вельмі
складаная. Іерарх нагадаў словы Бэнэдыкта ХVI падчас сёлетняй прамовы да дыпламатычнага
корпусу, акрэдытаванага пры Апостальскай Сталіцы, у якіх Святы Айцец запэўніў егіпцян
у сваёй блізкасці і малітве. Адначасова Пантыфік нагадаў, што вызнаўцы Хрыста з’яўляюцца
паўнапраўнымі членамі грамадства і таму ім павінны быць гарантаваны роўныя з усімі
правы, перш за ўсё права на свабоду публічнага вызнавання сваёй рэлігіі.