Imzot Myler: Benedikti XVI është teolog i hollë, që kuptohet nga të gjithë
Kam njohur pak vetë në jetë me kaq horizont e përgatitje intelektuale: prefekti i
Kongregatës për Doktrinën e Fesë, kryeipeshkvi Gerard Ludvig Myler flet kështu për
Papën Benedikti XVI dhe magjisterin e tij, si para, ashtu edhe pas zgjedhjes në fronin
e Shën Pjetrit. Prefekti, i impenjuar prej kohësh në përpilimin e “opera omnia” të
Atit të Shenjtë, paraqiti ditët e kaluara librin “Të zgjerosh horizontin e arsyes”.
Në të, ai ofron interpretimin e tij për shkrimet e Papës teolog. Në mikrofonin tonë,
imzot Myler përvijon portretin e Jozef Racinger: Ka bërë rrugë të gjatë me jetën
e me reflektimet e tij. Ka filluar 15 vjeç, sot është 85: pra, janë 70 vjet reflektimi
të thellë e meditimi. Ka pasur shumë përvoja në jetë: i ri, jetoi nacionalsocializmin
dhe fashizmin, luftën, ngjarjet e ndryshme… Prandaj, nuk ka qenë kurrë intelektual
i mbyllur në kullën e vet të fildishtë, por edhe sot, është i pranishëm në jetën e
të gjithë njerëzve, thellësisht i zhytur në historinë e shekullit XX, por edhe të
këtij shekulli. Është një ndër të paktët me horizont kaq të gjerë: njeh zhvillimin
e filozofisë në Evropë, duke filluar nga grekët e romakët për të përfunduar me filozofët
modernë. Njeh pastaj, historinë e Kishës, pyetjet dhe sfidat, që propozojnë shkencat
e natyrës sot. Njoh pak njerëz me këtë thellësi mendimi, kaq i nevojshëm në ditët
tona.
Si Papë, Benedikti XVI dëshmon se edhe një teolog i madh di të flasë
në gjuhën e njerëzve të thjeshtë, duke gjetur shprehje të reja për të vërtetat e lashta
të fesë. A ka ndonjë gjë, që ju bën përshtypje, në këtë aspekt?
Le ta themi
kështu: Jezu Krishti është Fjala e Zotit, por kur erdhi në këtë botë, u foli shumë
thjesht zemrave të gjithë njerëzve. U foli farisejve, intelektualëve të mëdhenj të
botës së vet, të kohës së vet, por dëshmoi gjithnjë respektin e madh të Zotit për
të gjithë njerëzit. Prandaj, është e nevojshme dhe shumë e rëndësishme që të gjithë
teologët të jenë barinj, t’u drejtohen të gjithë njerëzve, sepse Zoti nuk do vetëm
intelektualët, njerëzit gjenialë, por të gjithë.
Në një paragraf të librit,
ju flisni për gjuhën e mediave të reja. Në këtë drejtim, a ka ndonjë gjë të veçantë
në magjisterin e Benediktit XVI?
Feja dhe Zbulesa janë mënyrat, që përdor
Zoti për të komunikuar me ne. Përmes këtyre mjeteve ne mund të komunikojmë, jo në
mënyrë ideologjike – pra, duke i influencuar njerëzit kundër arsyes – por me dialog,
me mendje të hapur për të vërtetën, sepse vetëm e vërteta mund t’i shpëtojë njerëzit
e jo propaganda.