Դամասկոսի մէջ «Ազդակ»-ի թղթակիցի հաղորդակցութեան համաձայն, մինչ ջանքեր կը գործադրուին
Սուրիոյ խորհրդարանին մակարդակով քաղաքական լուծում գտնելու ծրագիրը յաջողցնելու երկխօսութեան
միջոցով` սուրիական տագնապէն դուրս գալու եւ աւելի ամուր ու ժողովրդավար պետութիւն մը
կառուցելու համար, որ պայմանաւորուած է բազմակարծութեամբ եւ իրաւունքը պաշտպանելու հանգամանքով,
անցնող օրերուն Դամասկոսի ապահովական իրադարձութիւններու առանցքը կազմեցին զինուորական
օդանաւներու եւ թնդանօթներու հարուածները արեւելեան արուարձաններուն ուղղութեամբ, ուր
սուրիական բանակը կը հալածէ զինեալները: Իսկ Ժարամանա արուարձանին մէջ երկու ռումբեր
եւ հրթիռ մը հարուածեցին բնակելի շէնքեր` պատճառելով ծանր վնասներ: Ժարամանայի մօտ արեւելեան
արուարձաններէն Մլեհայի մէջ զինեալներու կեդրոնները թիրախ ընտրելով զինուորական օդանաւները
եւ թնդանօթները հարուածեցին շրջանը: Ռմբակոծման իբրեւ արդիւնք բախումներու գօտիին մօտ
գտնուող նոյն Ժարամանա արուարձանի կարգ մը շրջաններու տուները վնասներ կրեցին, որուն
իբրեւ հետեւանք բնակիչները ստիպուեցան տեղափոխուիլ մայրաքաղաքի աւելի ապահով շրջաններ:
Յիշենք, որ Ժարամանա շրջանին մէջ բնակութիւն հաստատած են մօտ 400 հայ ընտանիքներ: Մայրաքաղաքի
տարբեր խաղաղ շրջաններու մէջ արձանագրուեցան նաեւ ընդհարումներ եւ պայթուցիկ սարքերու
պայթումներ` պատճառելով նիւթական վնասներ եւ զոհեր: Յատկանշական է նաեւ մայրաքաղաքի տարբեր
թաղամասերու եւ ծայրամասերու ելեկտրականութեան հոսանքի երկար ժամերով անջատումը: