Արամ Ա. Կաթողիկոսի Հանդիպումը Ռայի Պատրիարքին Ներկայացուցիչին Հետ։
Արամ Ա. կաթողիկոսը շաբաթ, 12 յունուարի՝ առաւօտուն, իր գրասենեակին մէջ ընդունեց մարոնի
եկեղեցւոյ հոգեւոր պետ Ռայի պատրիարքին փոխանորդը` Փոլ Սայյահ արքեպիսկոպոսը: Սայյահ
արքեպիսկոպոսը պատրիարքին կողմէ առաքուած էր յատուկ կերպով վեհափառ հայրապետին փոխանցելու
օր մը առաջ պատրիարքին գլխաւորութեամբ տեղի ունեցած մարոնի քաղաքական ղեկավարներու խորհրդակցութեանց
արդիւնքը` Լիբանանը եւ ընդհանրապէս Միջին Արեւելքը յուզող հարցերուն եւ յատկապէս ընտրական
օրէնքին շուրջ: Վեհափառ հայրապետը իր կարգին ողջունելով հանրապետութեան նախագահին եւ
պատրիարքին աշխատանքները նշեալ հարցերուն գծով շեշտեց, որ անհրաժեշտ է մշակել այնպիսի
ընտրական օրէնք, որով յարգուին համայնքներու իրաւունքները եւ տեսակէտները, ինչպէս նաեւ
համայնքներու կարեւոր դերը իրենց երեսփոխաններու ընտրութեան մէջ: Սայյահ արքեպիսկոպոսը
յայտնեց վեհափառին, որ այս հարցերուն գծով պատրիարքը միշտ հաղորդակցութեան մէջ պիտի
ըլլայ վեհափառ հայրապետին հետ, որպէսզի կարելի ըլլայ հաւաքական քրիստոնէական մօտեցումներ
որդեգրել կարեւոր հարցերու շուրջ: