Бэнэдыкт XVI да італьянскай паліцыі: сведчыце аб любові Божай ва ўсіх асяродках
14 студзеня Бэнэдыкт
XVI сустрэўся з супрацоўнікамі аддзялення італьянскай паліцыі, якая сочыць за парадкам
на плошчы св. Пятра, тэрыторыі вакол Ватыкана і арганізуе бяспеку Пантыфіка падчас
яго падарожжаў па Італіі. Візіт паліцэйскіх, а таксама членаў іх сем’яў, да Святога
Айца пасля свята Божага Нараджэння, з’яўляецца даўняй традыцыяй. Падчас такіх сустрэч
Папа дзякуе ахоўнікам парадку за адданую службу, а таксама прапануе некалькі разважанняў
аб значэнні веры ў працоўным і асабістым жыцці. Сённяшняя аўдыенцыя не стала выключэннем.
Бэнэдыкт XVI адзначыў высокі прафесіяналізм, з якім паліцэйскія выконваюць свае абавязкі,
асабліва “падчас маніфестацый вернікаў і пілігрымаў, што прыбываюць з усяго свету,
каб сустрэцца з Наступнікам св. Пятра і наведаць магілу Князя Апосталаў”, а таксама,
каб памаліцца каля магіл іншых Папаў, у першую чаргу бл. Яна Паўла ІІ. Святы Айцец
падкрэсліў, што ўзорная служба паліцэйскіх, сведчыць аб “добрых адносінах, якія існуюць
паміж Італіяй і Апостальскай Сталіцай”.
“Ад усяго сэрца жадаю, каб ваша праца,
якая часам звязана з ахвярнасцю і рызыкай, заўсёды натхнялася моцнай хрысціянскай
верай, якая без сумненняў з’яўляецца самым каштоўным духоўным скарбам, што быў перададзены
вам ў вашых сем’ях і які вы пакліканы перадаць сваім дзецям. Год веры, які перажывае
ўвесь Касцёл, з’яўляецца магчымасцю таксама для вас звярнуцца да паслання Евангелля
і дазволіць яму глыбока ўвайсці ў вашы сумленні і штодзённае жыццё, з адвагай даючы
сведчанне аб любові Божай ва ўсіх асяродках, таксама і на вашай працы”, - сказаў Папа.
Бэнэдыкт XVI таксама пажадаў, каб праца паліцэйскіх была гарантыяй парадку
і спакою, якія з’яўляюцца фундаментальнымі для мірнага і споўненага сацыяльнага жыцця.
Спакой і парадак, паводле Папы, акрамя таго, што з’яўляюцца плёнам евангельскага паслання,
таксама – знакам сапраўднай цывілізаванасці.