Dëshmojeni me guxim dashurinë e Zotit në çdo ambient: kështu Papa, personelit të policisë
pranë Vatikanit
Benedikti XVI priti sot paradite në audiencë, drejtuesit dhe personelin e Inspektoratit
të Sigurisë Publike pranë Vatikanit. Takimi i përvitshëm i dha rastin Papës për të
falenderuar të gjithë policët e impenjuar në ruajtjen e rendit, në Sheshin e Shën
Pjetrit në Vatikan dhe përgjithësisht, në Romë e Itali, gjatë vizitave baritore të
Atit të Shenjtë. Papa vuri theksin në stilin e impenjimit të tyre, në mënyrën si e
konsiderojnë punën në Vatikan, në fenë që i shoqëron: “Uroj nga zemra që puna
juaj, jo rrallë, bërë me sakrifica e rreziqe, të frymëzohet gjithnjë nga një fe e
shëndoshë kristiane, e cila është pa dyshim, thesari dhe vlera shpirtërore më e çmuar,
që ju kanë besuar familjet e që duhet t’ua transmetoni fëmijëve”. Papa përmendi
Vitin e Fesë, që sapo ka filluar dhe e konsideroi si mundësi për t’u thelluar sërish
në mesazhin e Ungjillit e për ta lejuar të brumosë më thellë ndërgjegjen dhe jetën
e përditshme. E inkurajoi personelin e policisë ta dëshmojë “me guxim dashurinë e
Zotit në çdo ambient”, duke filluar nga ai i punës. Pikërisht me punën e tyre, policët
sigurojnë mbarëvajtjen e çdo veprimtarie, që zhvillohet në Sheshin e Shën Pjetrit
e kudo ku shkon Papa, brenda Italisë. Benedikti XVI e vlerësoi lart dëshirën e policëve
për paqe, për një jetë të plotë e të lumtur, e uroi: “Prania juaj, të dashur
miq, qoftë garanci, gjithnjë e vlefshme, për atë rend e për atë qetësi, që janë themelet
e ndërtimit të një jete shoqërore paqësore e të drejtë, e që, përveçse i mësojmë nga
mesazhi ungjillor, janë edhe shenja të qytetërimit të vërtetë”.