Біскупы ўражаны сілай і адвагай хрысціян Святой Зямлі
10 студзеня закончыўся
візіт дэлегацыі біскупаў з краін Еўропы і Паўночнай Амерыкі ў Святую Зямлю. За пяць
дзён свайго падарожжа іерархі наведалі Бэтлеем, Іерусалім, некалькі гарадоў у Іараданіі.
Яны сустрэліся з прадстаўнікамі хрысціянскіх супольнасцяў, а таксама бежанцамі – ахвярамі
вайны ў Сірыі. У выніковым паведамленні біскупы адзначылі, што “іх вера была ўмацавана
сілай і адвагай людзей, якіх яны сустрэлі”. “Мы атрымалі натхненне для будавання справядлівага
міру і звяртаемся з заклікам да хрысціянскіх супольнасцяў у нашых родных краінах,
а таксама да людзей добрай волі ва ўсім свеце, каб падтрымалі працу, што вядзецца
ў рэгіёне дзеля пабудовы лепшай будучыні”, - напісалі іерархі. Яны падкрэслілі таксама,
што былі пазітыўна ўражаны дзейнасцю тых, хто клапоціцца аб бежанцах з Сірыі і Ірака,
хто змагаецца супраць пераследу і небяспекі ў розных дзяржавах Святой Зямлі. Асабліва
станоўча біскупы ацанілі працу двух дабрачынных устаноў: “Catholic Relief Service”
у Газе і аддзялення “Caritas” у Іарданіі.
Таксама члены дэлегацыі падкрэслілі,
што “пакліканы прызнаць і перадаць іншым, як вера ў Бога нясе святло ў жыццё жыхароў
Святой Зямлі”. “Адным з спосабаў, дзякуючы якому гэта рэалізуецца, з’яўляецца дзейнасць
Касцёла ў сферы адукацыі – важная інвестыцыя ў будучыню”, - напісалі біскупы. Яны
адзначылі, што вялікае ўражанне на іх зрабілі сведчанні студэнтаў Бэтлеемскага універсітэта,
якіх яшчэ ў 2009 г. Папа заклікаў быць “будаўнікамі справядівага і мірнага грамадства,
што складаецца з людзей розных веравызнанняў і народнасцяў”.
Члены біскупскай
дэлегацыі заклікалі хрысціян здзяйсняць пілігрымкі ў Святую Зямлю, каб так, як яны,
адчуць цяпло мясцовай гасціннасці. Яны паабяцалі прыкласці намаганні, каб пераканаць
урады сваіх краін у неабходнасці спрыяць міру ў гэтым рэгіёне і паўтарылі нядаўні
заклік Папы: “Іерусалім, стань тым, што азначае тваё імя! Горадам супакою, а не падзелаў!”.
Візіт
дэлегацыі біскупаў з краін Еўропы і Паўночнай Амерыкі праходзіў 5-10 студзеня 2013
г. і быў арганізаваны Каардынацыйным цэнтрам Біскупскіх Канферэнцый на карысць Касцёла
ў Святой Зямлі і Асамблеяй каталіцкіх біскупаў гэтага рэгіёна.