Kalorësit e Maltës mirëpresin Mesazhin e Papës për Ditën Botërore të Paqes.
Kalorësit e Urdhërit Sovran Ushtarak të Maltës e mirëpritën mesazhin e Benediktit
XVI për Ditën Botërore të Paqes 2013, me temë “Lum veprimtarët e paqes”. Fjalët e
këtij mesazhi jehojnë fuqimisht në zemrat e Kalorësve, sepse ata jetojnë sipas tetë
Lumturive, që simbolizohen edhe në tetë cepat e kryqit të Maltës. E pohoi këtë mjeshtri
i madh, vëllau Matthew Festing, që i drejtoi dje fjalimin për fillimin e vitit të
ri, Trupit diplomatik të akredituar pranë Urdhërit. Ndërmjet diplomatëve, edhe ambasadori
i Shqipërisë, shkëlqesia e Tij, Zoti Rrok Logu. Vetëm solidariteti i vërtetë mund
të veprojë si ilaç për shërimin e plagëve të papunësisë, të varfërisë, të konflikteve
civile, theksoi vëllau Festing, duke cituar fjalët e shkëputura nga mesazhi papnor.
Për mjeshtrin e madh, mesazhi më domethënës i paqes për vitin 2012, është ai i shtegtimit
të Papës në Liban, shtatorin e kaluar. U prekëm thellësisht nga dëshmia e fortë e
nga guximi i Atit të Shenjtë që, një një çast kaq vendimtar, i mbështeti të krishterët
dhe pohoi me forcë nevojën e bashkëjetesës së feve, nënvizoi mjeshtri i madh. E kjo,
sepse mbrojtja e lirisë fetare është pjesë përbërëse edhe e misionit të Urdhërit të
Maltës, si Urdhër laikal i Kishës katolike. Prej këndej Kancelaria jonë, duke nisur
nga vitit 2007, po realizon një plan për mbrojtjen dhe mirëmbajtjen e trashëgimisë
kulturore dhe fetare, posaçërisht në zonën Mesdhetare. Prandaj, së bashku me Komisionin
Evropian, Republikën e Qipros dhe UNESCO-n, nisëm një sërë konferencash, për të nënvizuar
impenjimin tonë e edhe kërkimin e rrugëzgjidhjeve të mundshme.Në fjalimin e tij, mjeshtri
i madh shtoi se në vitin 2013 parashikohet pjesëmarrja e rreth 3.500 anëtarëve e vullnetarëve,
që do të arrijnë nga të katër anët e botës, për të kremtuar, në bazilikën e Shën Pjetrit,
në praninë e Papës Benedikti XVI, 900-vjetorin e shpalljes së Bulës së Papës Paskuali
II, dorëzuar Urdhërit më 15 shkurt 1113, që formalizoi natyrën dhe identitetin e tij
shpirtëror. Lidhur me këtë, kujtoi edhe se në vitin 2012 Urdhëri i Maltës ishte i
pranishëm në Liban, Siri e Burkina Faso, për të ndihmuar refugjatët malianë; ndërsa
në Filipine e Haiti, të shpërngulurit për shkak të stuhive e tifoneve. E ndjeshme
ishte edhe prania në Kenia, ku përfaqësuesit e Urdhërit mbështetën popullsinë e dëmtuar
rëndë nga kriza ushqimore e Bririt të Afrikës. Vëmendje e veçantë iu kushtua projekteve
në Gjermani, Francë, Belgjikë, Itali e edhe në Kubë. Fra Matthew Festing numëroi,
në përfundim, vizitat e shumta të presidentëve e kryeministrave, që priti gjatë vitit
2012 si dhe shtegtimet në disa nga 120 vendet, ku Urdhëri është i pranishëm me veprimtaritë
e tij mjekësore-humanitare: posaçërisht, në Austri, ku u prit nga presidenti Fischer
e në Rusi, ku bisedoi me Patrikun Kirill si për bashkëpunimin humanitar e kulturor,
ashtu edhe për shqetësimin e përbashkët përballë shekullarizmit e diskriminimit fetar.