Кардынал П’ячэнца, магчыма, напіша ліст да бацькаў святароў
Пра ўнікальную ролю
маці ў нараджэнні святарскага і манаскага паклікання распавёў у інтэрв’ю Ватыканскаму
радыё кардынал Маўра П’ячэнца, прэфект Кангрэгацыі па справах Духавенства. Іерарх
спаслаўся на свой нядаўні ліст да маці святароў і семінарыстаў і адзначыў, што такім
чынам жадаў падзякаваць тым, хто прыняў “дар духоўнага мацярынства адносна пакліканых
да святарскага служэння, ахвяруючы сваё жыццё, малітвы, цярпенні і цяжкасці, а таксама
радасці”. Кіраўнік ватыканскай дыкастэрыі звярнуў увагу на тое, што роля маці ў пакліканні
да святарскага жыцця з’яўляецца “унікальнай і адмысловай”. “Кожную маці павінна радаваць
тое, што жыццё яе сына не толькі рэалізуецца, але і будзе надзелена спецыяльным Божым
абраннем, якое ахопіць і ператворыць яго на ўсю вечнасць”, - сказаў кардынал П’ячэнца.
Ён нагадаў, што св. Моніка, маці св. Аўгустына, з’яўляецца пунктам адліку для ўсіх
маці святароў.
Прэфект Кангрэгацыі па справах Духавенства прызнаўся таксама,
што ў будучыні не выключае напісанне ліста да бацькаў святароў. “Безумоўна, разважанне
аб выхаваўчай ролі бацькі ў перадачы веры сваім дзецям, што, магчыма, паспрыяе пакліканням,
можа стаць карысным”, - сказаў кардынал П’ячэнца. Як прыклад ён прывёў бацьку бл.
Яна Паўла ІІ, які паспрыяў нараджэнню і развіццю паклікання сына. “Папа гаварыў, што
для яго першай семінарыяй было бачыць вечарам свайго бацьку, які маліўся на ружанцы,
стоячы на каленях перад ложкам”, - узгадаў ватыканскі кардынал. “І гэта прымушае нас
падумаць аб многіх рэчах, якія спалучаны з роляй бацькі”, - дадаў ён.