ልደት 2004 ዓ.ም. ( 1/8/2012)

“ይእዜኒ ለሰላም ንትልዋ መድኃኒነ ተወልደ ነዋ ይእዜኒ ለሰላም ንትልዋ” ( ምልጣን ልደት)።
መዝሙር፡ ይሰርቅ ኮከብ እምያዕቆብ ወየአትት ኃጢአተ እም እስራኤል . . . . . ።
ንባባት፡ ቲቶ፡ 2፡11~14፥ 1ዮሓ 4፡1~9፥ ግ.ሓ.7፡17~23፥ ሉቃስ 2፡1~14.
ምስባክ፡ ወአነሂ በኲርየ እረስዮ፥ ወልዑል ውእቱ እም ነገስተ ምድር ወለዓለም አዓቅብ ሎቱ ሣህልየ። “አነ እውን በዅረይ ክገብሮ እየ ንሱ ኻብ ነገሥታት ልዕል ዝበለ ኺኸውን እዩ፥ ነቲ ዘተስፈኽዎ ምሕረት ንዘለዓለም ክሕልወሉ እየ፥ ኪዳነይ እውን ከጽንዓሉ እየ” መዝ. 89፦27~28።
ክብራን መፍቀርቲ አምላኽ ህዝበ እግዚአብሔር በዚ ብሩኽን ፍሉይ ዕለት ልደት መድኃኒና ኢየሱስ ክርስቶስ ክንዝክር ከሎና እንቋዕ አብ ብርሃነ ልደቱ አብጽሓና ናይ ሰላምን ፍቕሪን ምሕረትን ልደት ገሩ አብ ሕይወት ነፍሲ ወከፍና ፍሉይ ፍቕሪ አምላኽ ዘሕድር ይግበረልና። ከምኡ አብ ዝተፈላለየ ክፍሊ ዓለም ዝርከቡ በተሰብኩምን ፈተውትኹምን ጸጋ አምላኽ ዝበዝሖ ልደት ክገብረሎም፥ አብ ሃገርናን ዓለምናን ከአ ሰላም ነጊሱ ደቂ ሰብ ጣዕሚ ፍቕሪ አምላኽ ዘስተማቕሩሉ ዘመን ከውርደልና ብልቢ እና ተመነኹ ንኹልኹም ርሑስ ልደት እብል። ከምኡ ነቶም አብ ዝተፈላለየ ጸገም ዝርከቡ በዚ ብሩኽ ልደት አምላኽ ራህዋ ከውርደሎም ክንጽሊ፥ ኃጥአን አብ መገዲ አምላኽ ክምለሱ ዝተባእሱ ክዕረቑ ዝጠፍኡ ክርከቡ። ውግእን ግፍዕን ካብ ዓለምና ጠፊኡ ሰብ ሰላም አምላኽ ዘስተማቕረሉ ዘመን ክህበና አብዚ እነዕርጎ ዘሎና እናዘከርኩ ፍሉይ ጸሎትን መስዋዕትን ምእንቲ ነፍሲ ወከፍና እናአዕረግና ብዳግም ብሩኽ ልደት እብል።
ልደት መድኃኒና ፍሉይ ምዕራፍ አብ ሕይወት ደቂ ሰባት ዝኸፍት እዩ። ቅዱስ መጽሓፍ ነቶም አብ ጸልማት ዝነበሩ ብርሃን በሪቕሎም እናበለ ናይ ክርስቶስ ልደት ዘምጽኦ ምሕረት ይነግረና። ኢሳያስ ነብይ አብ 9፡1~6 ዘሎ እንተ አንበብና፡ “እቲ አብ ጸልማት ዚነብር ህዝቢ ዓቢይ ብርሃን ረአየ፥ ነቶም አብ ጸልማት ምድሪ ሞት ዝነብሩ ድማ ብርሃን ወፀሎም” እናበለ ክርስቶስ ዘምጽኦ ምሕረትን ለውጥን አብ ሕይወት ደቂ ሰባት ተነብዩ። ኢሳያስ ንጉሥን አማኸርቱን ንአምላኽ ምእማን ስለ ዝአበዩ አብ ጸልማትን ፍርሕን ከም ዝነበሩ ይነግር። ንአምላኽ ዝሓደገ ሕይወት መለለይኡ ፍርሒ ስግአት ጥርጠራ እዩ። ናይ እግዚአብሔር ድለት አብ ህዝቡ ክርእዮ ዝደሊ ሰላማን ሓጎስን እዩ። ነቲ ዝነበረ አርዑት ዘውርደሎም መድኅን ከም ዝሰድድ አቐዲሙ ነጊሩ ነሩ እዩ። ነቲ ብነብያት ዝተነግረ ተስፋ ኩሉ ጊዜ ምስ ሓለዎ እዩ።
ሰብ አብ ከቢድ ባርነትን ጭቆናን እንከሎ ምልክት ነጻነት እንተ ረአየ ዝስምዖ ሓጎስ ኩልና ንርድኦ ኢና። ብተፈጥሮና ንጭቆና ንጸልማት ስለ ዘይተፈጠርና አይውሓጠልናን እዩ። ወላ እውን ብድኽነት ንገዛእ ኩሉ ጊዜ ነጻነትን መሰልን ንደሊ እዚ አብ ባኅርና ዘሎ ነገር እዩ። አብ ልደት ነዚ ኢና እነስተማቕር። ልደት ክርስቶስ ካብ ጸልማት አብ ብርሃን ካብ ባርነት አብ ነጻነት አውጺኡና። ነዚ አምላኽ ዝገበረልና ሰናይ ነገር ደጋጊምና ነስተማቕሮ ነብዕሎ ካብኡ ዝዓቢ ጉዳይ ስለ ዘይብልና።
መዝሙር፡ “ኮኸብ ካብ ያዕቆብ ክወጽእ እዩ ኃጢአት ዓለም ከአ ካብ እስራኤል ክድምስስ እዩ፥ አነ እውን በዅረይ ክገብሮ እየ ካብ ነገስታት ምድሪ ልዕል ዝበለ እዩ፥ አብ እምባታት፥ ሎሚ አብ ሰማያት ሠራዊት መላእኽቲ ክሕጎሱ እዮም” ዝብል ንዝምር። እቲ አምላኽ ካብ ጥንቲ ዝሃቦ ተስፋ ሎሚ ተተግቢሩ፥ ምጽአቱ ንደቂ ሰብ ካብ ግዝአት ኃጢአት ነጻ አውጺእዎም። ሎሚ መዓልቲ ሓጎስን ዓወትን ስለ ዝኾነ ኩሉ ፍጡር በቲ ክርስቶስ ዘምጽኦ ጸጋ ተሓዲሱ አብ ደምበ አምላኽ ክርከብ ዘዘኻኽር ቅዱስ መዓልቲ እዩ።
ምጽአት ክርስቶስ ንደቂ ሰባት ፍሉይ ድኅነት አምጺኡልና፥ ኃጢአት ተደምሲሱ በዚ ኸአ ደቂ አምላኽ ዝገብረና ፍሉይ ጸጋ ተዓዲልና። ቅዱስ የውሃንስ ከምዝብሎ ብልደት ኢየሱስ ውሉድ ብርሃን ኮና ይብለና። ብልደት ክርስቶስ ደቂ እቲ ልዑል ናይ ምዃን መሰል ረኺብና ነዚ መሰረት ገሩ ናይ ሎሚ ሰንበት መዝሙር ትርጉም ልደት መድኃኒና ይገልጸልና።
ቅዱስ ጳውሎስ “ናይ አምላኽ በረኸትን ተስፋን አብ ኢየሱስ ሥጋ ለቢሱ” ይብለና። ኢየሱስ ናይ እግዚአብሔር አብ ፍጹም ተአማንነትን ፍቕሪ ንደቂ ሰባትን ብመልክዕ ሰብ ዝተገልጸ እዩ። ካብ ዘርኢ ዳዊት ክውለድ እንከሎ ንሱ ነቲ ናይ ጥንቲ ትንቢት ጥራሕ አይኮነን ፈጺሙ ልዕሊ ክንርድኦ እንኽእል ገሩ እዩ ገሊጹልና። ንሱ ካብ አርዑት ኃጢአትን ካብ ግዝአት ዝንባሌ ኃጥአትናን ነጻ ከውጽአና መጺኡ። ኢየሱስ ዝመጸ መንግስቱ ከቕውም መንግስቱ ኸአ መንግስቲ ሰላም ፍቕርን ሓጎስን እዩ።
ልደትና መቐረት ክህልዎ ክንገብሮ ዝግብአና ነገራት አሎና።

ልደት ዕርቂ ምስ አምላኽን ሰብን እንእውጀሉ እዋን እዩ። ምስ አምላኽ ዘሎና ርክብ። ምስ ከማና ዝበሉ ዘሎና ርክብ ርኢና ክንክእል የድሊ። እሞ አብቲ ክርስትስ ዘምጽኦ ጸጋ ክንመልሶ። አምላኽ ከማና ሰብ ኮይኑ ክንብል ከሎና ንሕና ከምኡ ክንከውን ምእንቲ እዩ። ከም አምላኽ ዘሎኹ ወይስ መልክዐይ ተቐይሩ ምስሊ አቦይ አጥፊኤ አሎኹ ኢልና አብ መፈጠር መልክዕና ክንመስል። ንሓፍትና ንሓውና ከማና መልክዕ ክርስቶስ ዝተዓደሉ ዘለውዎ ሕይወት ርኢና ክነለልዮም። አነን ንስኻን ደቂ ሓደ አምላኽ ኢና እሞ ሕውነትና ንሓድስ ክንብል ከሎና አባና ክርስቶስ ብዳግም ተወሊዱ አሎ። መልክእና ሃሲሱ መንፈሳዊ ማዳ መሊኡ ሰባት ምልላይና ስኢኖም እንተለዉ ሎሚ መንፈሳዊ ሕክምና ረኺንባ እንሓውየሉ እዋን ስለ ዝኾነ አብቲ ዕለት ዕለት ንድሕነትና ዝቐርበና አምላኽ ሎሚ እውን ሕጂ መጺኤ አሎኹ እናበልና ንቀበሎ ሽዑ ሕልናና ዕሩፍ መልክእና መልክዕ አምላኽ ክኸውን እዩ።
ሰላም መለልዪ ልደት እዩ። መላእኽቲ ሰማይ ልደት ክርስቶስ ከበስሩ ከለዉ መዝሙር ሰላም እናዘመሩ እዮም አዊጆሞ። ንኹሉ ዝኸውን ሰላም ተዋሂብኩም አሎ እናበሉ ክርስቶስ ንሰላም ንፍቕሪ ከም ዝመጸ አዊጆምልና። “ይእዜኒ ለሰላም ንትልዋ እስመ ተወልደ ክርስቶስ ዮም በዛቲ ዕለት” እናበልና ብመዓልቲ ልደት ሰላም መለልዩና ክኸውን ከም ዝግባእ ይሕብረና። ሎሚ ሰብ ሰላም ስኢኑ አብ ኩሉ እንተ ረኤና ንሰላም ብማዕዶ ዝርኢ በዚሑ አሎ። ስድራታት ሰላም ስኢኖም አህዛብ ሰላም ስኢኖም ኩሉ አብ ስእነት ሰላም ይነብር አሎ። ሎሚ እምብአር አብ ምንጪ ሰላም ዝኾነ ክርስቶስ ቀሪብና ሰላምካ አውጀልና ንበሎ። አብ ኩሉ ሰላም ሃበና እናበልና ንሰላም ዘውርድ መገዲ ሒዝና ክንርከብ። ሰላመይ እህበኩም አሎኹ ኢሉ ኢየሱስ አፍደገ ሰላም ኩሉ ጊዜ ምስ ከፈተልና እዩ። ሰላም ግን ሱቕ ኢላ ካብ ላእሊ እትውሃብ አይኮነትን ናይ ነፍስወከፍና ጻዕሪ የድልያ። ሰላም ክትረክብ አብ ገለ እውና መስዋዕቲ ክትከፍል ምስ ጥቕምኻን ስምኢትካን ምቅላስ የድሊ። አነ ዝህበኩም ሰላም ናይ እዚ ዓለም ሰላም አይኮነን ይብለና እንታይድአ ወሉድ አምላኽ ዝገብረና አብቲ ቀንዲ ምኽንያት ተፈጥሮና ዝመልሰና እዩ። ሰላም ክርስቶስ ሓዲስናዮ ክርከብ እሞ ንኹሉ ከምቲ አምላኽ ዝደልዮ ገርና ክንመርሖ።
ልደት ምስ ህያባትና ክንቕረብ። እቶም ቀዳሞት ዕዱማት ሕፃን ኢየሱስ ጓሶት መልአኽ ምስ አበሰሮም ካብ ጥሪቶም ህያብ ሒዞም ቀሪቦሞ። ካብተን ዝፈትውወን ጥሪቶም ንወሃብ ኩሉ አምላኽ ህያባቶም ሂቦሞ። ሰብአ ሰገል ካብ ርሑቅ ምስራቕ ንኢየሱስ ምስ ህያባቶም በጺሖሞ። ሎሚ አነን ንስኹምን ህያባትና ንኢየሱስ እንታይ እዩ። አምላኽ ካብቲ ዝህበና ክንህቦ ከምኡ ንአሕዋትና ክንህብ ድላዩ እዩ። ህያብ ምልክት ፍቕሪ ከምኡ ንሓደ ህያብ ክንህቦ ከሎና ጽጉም እንተኾነ አብ ጸገሙ ንሳተፍ አሎና። ዘይጽጉም እንተ ኾነ ኸአ ፍቕርና አኽብሮትና ንገልጸሉ። ንአምላኽ ህያብ ክነቕርብ ከሎና ነመስግኖ ኢና ዘሎና። ከምታ አብ ወንጌል ዘላ መበለት ክልተ ሳንቲም ዘቕረበት ብልብና ክነቕርበሉ ከሎና ተቐባላይ እዩ አምላኽና። አብዚ ብሩኽ ልደት እምብአር ንጽጉማት ክንሕግዝ ንዘኽታማት ክንዕንግል ትሑዛት ኢና። ሎሚ ንውሃብ ኩሉ ዝኾነ አምላኽ ካብቲ ዝሃበና ክንህቦ እንከሎና ጸጋ ኢና እነብዝሕ።
ልደት ንእምነትና ክንሰብኽ ከምዘሎና ዘዘኻኽር እዩ። ጓሶት ነቲ አምላኽ ዝገለጸሎም ምስ ረአዩ ነቲ ዝረአይዎ አምላኽ ዝገለጸሎም ኩሉ አብ ከባቢኦም ንዘለዉ ኩሎም ነጊሮም፥ ሰቢኾም ብኻልእ አዘራርባ። አብ እዋን ልደት ብዛዕባ እምነትና ክንሰብኽ ክነግር ንሰባት ትርጉም ልደት ክፈልጡ ክንሕግዝ። ትምህርቲ ወንጌል አብ ኩሉ ክበጽሕ ክንገብር ትሑዛት ኢና። ሎሚ ክርስቶስ አብ ሕይወት ሰባት ክአቱ እንሕግዝ እንልአኽ ንሕና ኢና። ትምህርቱ አብ ኩሉ ክነብጽሕ መብጽዓና ክነሐድስ አምላኽ ይደልየና አሎ።
አብ ልደት ትሕትና ክንለብስ ንርእስና ክንመልኽ ከምዝግብአና ክንሓስብ ይግብአና። አምላኽ ሰብ ኮይኑ ክአል ኩሉ እንከሎ አብቲ ድሩትን ውሱስንን ዝኾነ ባህርና አትዩ። ኢሚንቲ ኮይኑ። ኃጢአት ዘይብሉ እንከሎ ከም ኃጢአተኛ ኾይኑ። ብኹሉ ብዘይካ ኃጢአት ንአና መሲሉ። ሰብ ዝዓበየ ጸገሙ አነ ዝብል መንፈስ የጥቅዖ። ትዕቢት ንመላእኽትን ንደቂ ሰባትና ካብ አምላኽ አርሒቕዎም። ልደት ክንዝክር ከሎና እምብአር ነቲ ኩሉ ጊዜ ዘጥቅዓና ክፍአት ክነሸንፍ እሞ አብ ሕይወትና ትሕትና ክንለብስ፥ ንሥጋዊ ስምኢትና መሊኽና ካብ ከገልግሉና ክነገልግሎም ካብ ዝሰምዑና ክንሰምዖም፥ ካብ ዝህቡና ክንህቦም ዝብል መንፈስ ክነልብስ ይግብአና። እዚ እዩ መድኃኒ ብልደቱ ዘስተምሃረና።

ልደት አምላኽ አብ መንጎና ሓዲሩ ከምዘሎ ፈሊጥና አብ ሕይወትና ክንረኽቦ እሞ ምስኡ ናቱ ክንከውን። አብ ኩሉ ሕይወትና ንአምላኽ ቦታ ክንህቦ። ሕይወትና ንብረትና ከም መባእ ክነቕርበሉ እሞ ናቱ ክንከውን። ነፍሲ ወከፍና አብዚ እለት ዝተሓደሰ ሕይወት ዕርቂ ምሕረት ዝለበሰ ሕይወት ሒዝና ክንህሉ አምላኽ አብ ልብና አብ ርክባትና ክውለድ ክነፍቅደሉ እሞ ፍቓደኛታት ኮና ክንርከብ።
ትርጉምን ጣዕምን ምስጢርን ልደት ብዝያዳ ዝተረድኤት ማርያም አዲኡ እያ። ወላእኳ ብመልአኽ ኩሉ ይገለጸላ እምበር አብ ከርሣ ሓዲሩ ከም ሰብ ክውለድ ክትርእዮ ከላ ዕብየት መለኮቱን ምኽንያት ልደቱን ካብ ኩልና ብዝያዳ ዝተረድኤት እያ። ንሳ ምስጢር ስላሴ ተኻፊላ ካብ ኩልና ልዑል ቦታ ዝለበሰት እያ ምኽንያቱ አምላኽ ብአአ ገሩ እዩ መጺኡና። ካብ ፍጡራት ልዕሊ ማርያም ንአምላኽ ዝቐረቦ የለን ከምኡ ልዕሊ ማርያም ከስምዖ ዝኽእል የለን እሞ በዚ ብሩኽ ልደት ንኹሉ ተረዲእና እንኽእለሉ ጸጋ ክተውህበና ክትልምለልና ንለምና አብ ወድኽን አባኽን ክንምለስ መገዱን ትምህርቱን ክንክተል ሓግዝና ንበላ።
አብ መንጎና ዝኃደረ አምላኽ ሎሚ እውን አብ መንጎና ብዳግም ኃዲሩ ሰላም ፍቕሪ የውርደልና አብ ኩሉ ጸጋ ልደት የውርደልና። ብሩኽ ልደት ንኹልና።
ኣባ ንጉሠ ፍሥሓ