Бэнэдыкт XVI вызначыў праблемы сучаснай дыпламатыі
7 студзеня Бэнэдыкт
XVI сустрэўся з прадстаўнікамі дыпламатычнага корпусу, акрэдытаванага пры Апостальскай
Сталіцы. Такія сустрэчы адбываюцца штогод пасля святаў Божага Нараджэння і Новага
году. Лейтматывам сёлетняга паслання стаў заклік да спрыяння міру на планеце. Пантыфік
закрануў вялікі спектр актуальных тэм, якія турбуюць Апостальскую Сталіцу і яго асабіста.
Ён нагадаў між іншым пра пакуты людзей у гарачых кропках, пагарду да фундаментальных
чалавечых правоў і іх няправільнае разуменне, неабходнасць інвестававання ў адукацыю,
асабліва народаў бедных краін. Асаблівую ўвагу Папа звярнуў на неабходнасць спрыяння
прымірэнню ў Сірыі і аказання гуманітарнай дапамогі сірыйскаму народу, які на працягу
доўгага часу пакутуе ад узброенага канфлікту. Таксама Святы Айцец нагадаў аб неабходнасці
дапамогі ў вырашэнні араба-ізраільскага канфлікту. “У сувязі з прызнаннем Палестыны
краінай-назіральніцай ААН я аднаўляю мой заклік, каб з дапамогай міжнароднай супольнасці,
ізраіліцяне і палестынцы дзейнічалі на карысць мірнага суіснавання ў кантэксце двух
суверэнных краін, у якіх павага да справядлівасці і законных жаданняў абодвух народаў
будуць абаронены і гарантаваны. Іерусалім, стань тым, што азначае тваё імя! Горадам
супакою, а не падзелаў; прароцтвам аб Валадарстве Божым, а не пасланнем нестабільнасці
і супрацьстаяння!”, - заклікаў Святы Айцец. Ён выразіў таксама сваю заклапочанасць
сітуацыяй у Іраку, Паўночнай і Цэнтральнай Афрыцы.
Іншай тэмай, на якую звярнуў
увагу Пантыфік, стала неабходнасць абароны фундаментальных правоў чалавека, у першую
чаргу права на жыццё на ўсіх яго этапах. Папа пазітыўна адазваўся аб прынятай у студзені
2012 г. рэзалюцыі Парламенцкай Асамблеі Савета Еўропы аб забароне эўтаназіі, якая
была акрэслена як “свядомае забойства, дзеяннем ці бяздзейнасцю чалавека ў стане залежнасці”.
Адначасова Пантыфік з жалем адзначыў, што на працягу мінулага года ў некаторых краінах
з моцнымі хрысціянскімі каранямі, былі легалізаваны аборты.
“Аборт, які разглядаецца
ў якасці мэты ці сродка, цяжка супярэчыць маральнаму праву”, - сказаў Папа. Гаворачы
аб распаўсюджаным павярхоўным разуменні правоў чалавека, Бэнэдыкт XVI адзначыў, што
іх “не рэдка блытаюць з раздражнёнай маніфестацыяй аўтаноміі чалавека, які становіцца
самадастатковым, больш не адкрытым на Бога і іншых, але засяроджаным на сабе самім
у спробе задаволіць уласныя патрэбы”.
Акрамя спрыяння міру праз абарону правоў
чалавека, на думку Святога Айца, важна спрыяць адукацыі і выхаванню людзей. Паводле
яго, недахоп выхавання прывёў да эканамічна-фінасавага крызісу. “Ён развіўся таму
што часта празмерна абсалютызаваўся прыбытак, замест працы”, - сказаў Бэнэдыкт XVI
і дадаў, што “неабходна вучыць супрацьстаяць спакусам асабістых кароткачасовых выгод,
каб арыентавацца перш за ўсё на супольнае дабро”. “Акрамя таго, важна выхоўваць лідэраў,
якія ў будучыні ўзначаляць нацыянальныя і міжнародныя публічныя ўстановы”, - адзначыў
Папа. “Ясна, што для справядлівасці не дастаткова толькі добрых эканамічных мадэляў,
хоць яны і з’яўляюцца неабходнымі. Справядлівасць рэалізуецца толькі калі ёсць справядлівыя
людзі! Будаваць мір, азначае перш за ўсё вучыць людзей змагацца з карупцыяй, злачыннасцю,
вытворчасцю і гандлем наркотыкамі, знішчаць падзелы і напружанасць, якія нараджаюць
рызыку раскалыхаць грамадства, пагражаюць развіццю і мірнаму суіснаванню”, - адзначыў
Папа.
Яшчэ адной пагрозай міру Святы Айцец лічыць маргіналізацыю рэлігіі ў
грамадскім жыцці і нападкі на рэлігійную свабоду. Папа заклікаў дыпламатаў спрыяць
прымірэнню паміж народамі праз дыялог і прывёў прыклад пагаднення паміж польскім каталіцкім
епіскапатам і Маскоўскім Патрыярхатам.
Акрамя таго, Бэнэдыкт XVI нагадаў,
што дыпламатыя Апостальскай Сталіцы грунтуецца на любові, якая рэалізуецца ў розных
канкрэтных сферах дзейнасці Касцёла на планеце.