Papa Kishës kamboxhiane: martirët tuaj e feja juaj, farë shprese për vendin.
“Kisha kamboxhiane është plot gjallëri e dëshmia e fesë së besimtarëve e martirëve
të saj, sot, ashtu si dje, është burim shprese për mbarë vendin”. Kështu u shpreh
Papa në një video-mesazh, drejtuar pjesëmarrësve në Kongresin “Koncili II i Vatikanit
dhe Kisha”, që përfundoi sot në Pnom-Pén, organizuar me rastin e Vitit të Fesë. Në
përfundim, të pranishmëve iu dorëzuan tekstet e Koncilit II e të Katekizmit, përkthyer
në gjuhën kamboxhiane. Fytyra e Papës dukej në një vend e në një ditë, e cila për
historinë bashkëkohore, e sidomos, për Kishën e vogël, që jeton në këtë vend, ishte
tejet simbolike, me kuptim jashtëzakonisht të thellë. Është fjala për vendin, ku do
të lartohet përsëri katedralja e Pnom-Pénit, pikërisht aty ku ishte më 1975, kur u
rrënua nga regjimi gjakatar i Khmerëve të kuq të Pol Potit, e për ditën që të kujton
34 vjetorin e rënies së diktatorit. Fjalët e Benediktit XVI në videomeszh jehuan si
himn për paqen e rikthyer dhe për kontributin e gjakut, që i dha kësaj paqeje Kisha
kamoxhiane: “Duke kujtuar periudhën e çregullimeve, që e zhyti vendin tuaj
në errësirë, dua të nënvizoj se guximi, feja e heroizmi i barinjve tuaj dhe i vëllezërve
e motrave tuaja të krishtera, shumë nga të cilët gjetën edhe vdekjen, përfaqëson një
dëshmi fisnike për të vërtetën e Ungjillit”. Kështu nënvizoi Papa, e shtoi: “Të
jeni të sigurtë se vëllezërit e motrat tuaja, gjaku i të cilëve u derdh rrëke nëpër
orizoret, luten për ju, e ju kujton se duhet të jeni tharmi i brumit të shoqërisë
suaj, ta dëshmoni dashurinë e Zotit për të gjithë e të ecni në rrugët e drejtësisë
e të përdëllimit”. Fjala e Papës ishte një përqafim i vërtetë, që i rroku
të gjithë e për secilin pati një fjalë të mirë, një nxitje, një këshill, duke nisur
nga kongresistët, tek të rinjtë, nga meshtarët, tek seminaristët e tek pjesëmarrësit
në Meshën e sotme, në përfundim të së cilës u shpërndanë tekstet konciliare dhe Katekizmi,
përkthyer në kamboxhisht. Është shenjë e qartë, që tregon se Kisha, përfaqësuese e
1% të popullsisë, është e gjallë, vepron në një shoqëri me 96 % budistë e përgatitet
për një numër të madh pagëzimesh të reja. Papa e përfundoi video-mesazhin duke
iu drejtuar posaçërisht të rinjve e duke theksuar se Kisha ka besim të plotë në rininë,
hovin, çiltërisë e guximin e moshës së re. Prej këndej iu drejtua atyre dhe të gjithë
besmitarëve të krishterë, me fjalët: “Lutem për ju e ju ftoj të jeni dishepuj
bujarë të Krishtit. E ju të gjithë, që e kërkoni Krishtin, të jeni të sigurtë se Zoti
ju do e ju dhuron paqen e tij”. A s’e dëshmonte pikërisht kjo ditë se Zoti
ngadhënjeu edhe në këtë tokë, ku u ngritën male me rrashta? Që të kujtojnë pikërisht
Golgotën!