Бэнэдыкт XVI: евангельскія мудрацы – прыклад для біскупаў
Аб’яўленне Пана –
гэта выраз “дабрыні Бога і Яго любові да людзей”, - адзначыў Бэнэдыкт XVI падчас св.
Імшы 6 студзеня ў базыліцы св. Пятра. Падчас літургіі Святы Айцец удзяліў біскупскую
сакру чатыром намінантам: кс. прэлату Георгу Генсвайну, свайму асабістаму сакратару
і прэфекту Папскага дома, кс. прэлату Вінчэнца Дзані, сакратару Кангрэгацыі Каталіцкай
Адукацыі і двум Апостальскім нунцыям: Фартунатасу Нвачукву і Ніколасу Тэвеніну. У
сваёй гаміліі Пантыфік заклікаў новых арцыбіскупаў наследаваць прыклад евангельскіх
мудрацоў, якія вырушылі ў падарожжа ў “пошуку больш вялікай рэальнасці”. “Магчыма
яны былі сталымі людзьмі, якія мелі вялікія веды аб зорках і магчыма таксама валодалі
філасофскай адукацыяй. Але яны не хацелі ведаць шмат рэчаў. Хацелі ведаць перш за
ўсё самае важнае. Хацелі ведаць, як можна быць чалавекам. І таму хацелі пазнаць, ці
існуе Бог, дзе і які Ён”, - сказаў Папа.
Паводле Бэнэдыкта XVI таксама і
біскупы павінны быць “людзьмі, чый інтэрэс скіраваны да Бога, бо толькі тады яны будуць
па-сапраўднаму цікавіцца людзьмі”. “Біскуп павінен быць чалавекам, які клапоціцца
пра людзей, якога кранулі іх праблемы. Павінен быць чалавекам для людзей. Але ён можа
быць па-сапраўднаму такім, толькі тады, калі з’яўляецца захопленым Богам - калі для
яго, туга па Богу стала тугой па Яго стварэнні, чалавеку. Як мудрацы з Усходу, таксама
і біскуп не павінен быць тым, хто проста выконвае свае абавязкі і не хоча нічога іншага.”,
- адзначыў Пантыфік.
У гэтым кантэксце Бэнэдыкт XVI адзначыў, што для біскупа
фундаментальнай з’яўляецца малітва. “Біскуп, як пілігрым Божы, павінен быць перш за
ўсё чалавекам які моліцца. Павінен жыць у пастаянным унутраным кантакце з Богам”,
- сказаў Папа. Таксама Святы Айцец падкрэсліў важнасць для біскупаў адвагі і веры
– рысаў, якія дазволілі евангельскім мудрацам зразумець знак ззяючай зоркі і вырушыць
у невядомае падарожжа. “Мудрацы, ішлі за зоркай, і так дасягнулі Хрыста, у вялікім
святле, якое асвяціла кожнага чалавека, што прыходзіць на гэты свет. Як пілігрымы
веры, мудрацы сталі самі зоркамі, што ззяюць на небе гісторыі і ўказваюць шлях”, -
сказаў Папа. Паводле яго, таксама і біскупы, клі будуць жыць з Хрыстом, стануць “зоркамі,
якія ідуць перад людзьмі і ўказваюць ім правільны шлях”.