Իսրայէլեան «Մաարիւ» օրաթերթը կը հաղորդէ, որ 2013-ին Իսրայէլի եւ Իսլամ Եղբայրներու
իշխանութեան տակ եղող Եգիպտոսի միջեւ յարաբերութեանց ապագային մէջ անորոշութիւն կը տիրէ,
իսկ իսրայէլեան բանակը 2013-ը Միջին Արեւելքի մէջ անկայունութեան եւ «Արաբական գարնան»
շարունակման պատճառով « որոշումի տարի» կը կոչէ: Օրաթերթը կը նշէ, որ Եգիպտոսի նախագահ
Մոհամետ Մուրսի 2012-ին իսրայէլեան գաղտնի սպասարկութիւնը անակնկալի մատնելէ չէ դադրած`
նշելով, որ «Մուրսի բոլորը անակնկալի մատնեց բանակի ղեկավարութեան դէմ յեղաշրջում կատարելով
եւ իրեն մօտիկ անձեր նշանակելով, ինչպէս նաեւ բոլորը անակնկալի մատնեց Միացեալ Նահանգներու
եւ Իսրայէլի հետ յարաբերութեանց մէջ իր գործնապաշտութեամբ»: «Մաարիւ» կը յայտնէ, որ
«սխալ գնահատականներ կատարելը բացառուած է, որովհետեւ Մուրսիի գաղափարաբանութիւնը յստակ
է եւ Միջին Արեւելքի մէջ Իսրայէլի տեղ չի վերապահեր, սակայն ստիպուած է 90 միլիոն բերաններ
կերակրել տարեկան շուրջ 1.3 միլիառ տոլար ամերիկեան տարեկան օժանդակութեանց ճամբով,
ինչ որ զինք նախատեսուած չափաւորականութեան շրջան կը մղէ»: Իսրայէլեան օրաթերթը կ՛ընդգծէ,
որ 2013-ին Եգիպտոսի կողմէ Իսրայէլի հետ խաղաղութեան համաձայնութեան ջնջումը բացառուած
է, սակայն Իսրայէլի եւ Իսլամ եղբայրներու իշխանութեան տակ Եգիպտոսի միջեւ յարաբերութեանց
հեռակայ ապագան կը պարունակէ բազմաթիւ հարցեր, որոնք լաւատեսութիւն չեն ներշնչեր: