Presidenca e turnit e BE-së i kalon Irlandës: në qendër, çështja e bashkimit bankar
Që nga 1 janari, Irlanda mori në dorë presidencën e turnit të Këshillit të Bashkimit
Evropian, pas semestrit qipriot. Nga fjalët e ministrit të jashtëm irlandez, Gilmore,
doli në pah përparësia e Dublinit në gjashtë muajt, që do të udhëheqë Evropën: përmirësimi
i gjendjes ekonomike dhe rritja e vendeve të punës. Për sfidat, që e presin kontinentin
e vjetër, gjatë këtij viti të ri, folëm me ekonomistin italian Paolo Guerrieri, pedagog
i Ekonomisë ndërkombëtare në Universitetin “La Sapienza” të Romës: Urgjenca
më e madhe për Bashkimin Evropian është bashkimi bankar, një problem absolutisht i
rëndësishëm. Nga njëra anë, sepse bankat dhe sistemi bankar evropian mbeten edhe sot
hallka e dobët e kontinentit; nga ana tjetër, sepse ekziston kjo lidhje e mbrapshtë,
që duhet këputur, ndërmjet krizës së bankave e të sistemit bankar të disa vendeve
dhe borxheve shtetërore. Do të jetë vendimtare mënyra e veprimit të mëtejshëm, realizimi
i këtij projekti për bashkimin bankar. Dimë që ka filluar me miratimin e vigjëlimit
unik. Çfarë do të sjellë me vete presidenca irlandeze? Vetë Dublini po përballon
probleme të rënda ekonomike… Irlanda po zbaton një plan shumë të rreptë, në
një farë mënyre e për disa aspekte, shumë të frytshëm. Siç e dimë, bankat e mëdha
irlandeze kanë qenë shkaktaret e krizës së borxhit sovran të vendit. Tani, si presidente
e turnit e Bashkimit Evropian, Irlanda duhet të gjejë zgjidhje brenda këtyre muajve.
Interesohet drejtpërdrejt sidomos për njërin nga aspektet: që bashkimi bankar të mos
shërbejë vetëm për të ardhmen, për të parandaluar krizat e mëtejshme, por edhe për
të kaluarën, pra, për të përballuar krizat bankare të akumuluara deri tani. Më të
rëndat janë pikërisht në Spanjë e në Irlandë. Duhet ndihma evropiane, përndryshe burimet
e këtyre dy vendeve nuk do të jenë të mjaftueshme e sidomos lidhja ndërmjet krizës
bankare e krizës së borxheve nuk do të këputet kurrë. Muajt e ardhshëm janë gur prove.
2013-a është viti, që i kushtohet qytetarit evropian, i cili ka nevojë sidomos
për punë. Viti i Ri, a do të sjellë risi në këtë fushë? S’ka dyshim se kriza
evropiane sot, është sidomos krizë e mos-zhvillimit; madje, kemi kthim mbrapa, me
gjendje dramatike përsa i përket punësimit në Evropë. Prandaj, duhen politika të tjera,
që të mos heqin dorë nga rreptësia e rregullave, por të dinë të hapin edhe mundësi
të reja zhvillimi. Në një farë mënyre, kjo do të varet nga vendime të guximshme, që
urojmë të merren. Por, kam frikë se gjatë këtij viti do të mbizotërojnë ciklet zgjedhore:
më parë në Itali e më pas në Gjermani, ku shqetësimi kryesor është të ruhet një gjendje
e qetë. Unë mendoj se vendimet e guximshme, nismat e mëdha politike, vështirë të merren
deri në tetor o nëntor. Të shpresojmë se të paktën do të ruhet gjendja e muajve të
fundit, sepse edhe ky do të ishte rezultat i mirë.