Papa: familja është institucion i pazëvendësueshëm e shpresë e sigurt për
mbarë njerëzimin
“Biri i Zotit ka dashur të lind në një familje, duke i dhënë kështu asaj “domethënie
fisnike e rol të pazëvendësueshëm për njeriun e për shoqërinë”. Kështu pohoi në lutjen
e Engjëllit të Tënzot Papa Benedikti XVI gjatë përshëndetjes drejtuar besimtarëve
e shtegtarëve të pranishëm sot në Sheshin e Shën Pjetrit në Vatikan. “Familja – kujtoi
Ati i Shenjtë Ratcinger – është djep e vatër e natyrshme e fëmijës. Ajo është tokë
e parë dhe e pazëvendësueshme ku vënë rrënjët, ku njeriu formohet e ku ndërtohen lidhjet
njerëzore”. “Dashuria, besnikëria e përkushtimi i Marisë dhe Jozefit qofshin shembull
për të gjithë të martuarin e krishterë, të cilët nuk janë miq apo pronarë të jetës
së fëmijëve të tyre, por rojtarë të kësaj dhurate të paçmueshme të Zotit”. Prandaj,
“uroj që të gjitha familjet e krishtera të jetojnë më praninë e Zotit, me të njëjtën
dashuri e me të njëjtin gëzim që pati familja e Jezusit, Marisë dhe Jozefit”. Papa
i ftoi, pastaj, familjet “ta shndërrojnë e ta bëjnë botën shtëpi të vërtetë, vend
harmonie, solidariteti e respekti të anasjelltë”, dhe ia besoi Familjes së Shenjtë
të Nazaretit vështirësitë e jetës që ka çdo familje e sotme njerëzore, përherë të
bindur se me ndihmën dhe hirin e Zotit mund të kapërcehet çdo vështirësi e pengesë
që hasim në jetë. Mes tjerash Papa tha: “Të lutemi që çdo fëmijë të pritet e të
pranohen si dhuratë e Zotit, që të ndihmohet me dashuri të babait e të nënës, për
t’u rritur kështu si Jezusi “urti, në moshë e në hir para Zotit e para njerëzve”. Së
fundit, iu lut Virgjërës Mari e Shën Jozefit për t’i ndihmuar prindërit në edukimin
e fëmijëve të tyre dhe në transmetimin e fesë” në Hyjin e Gjallë. E duke përshëndetur
të gjithë pranishëm në Sheshin e Vatikanit e ata që e përcjellnin përmes radio televizionit,
Papa Benedikti XVI uroi “mbarimin e mbarë të vitit në dritën e në paqen e Zotit”.