Пілігрымы прыбываюць у Рым для ўдзелу ў сустрэчы “Taize”
Каля 40 тыс. чалавек
прыбылі ў Рым, каб прыняць удзел у XXXV Еўрапейскай сустрэчы моладзі арганізаванай
супольнасцю “Taize”. Форум працягнецца да 2 студзеня. У яго праграме: малітоўныя сустрэчы
разважанні, сумеснае пражыванне ў парафіях ці ў сем’ях, дзе пілігрымы будуць прыняты.
29 снежня, для ўдзельнікаў мерапрыемства адбудзецца вельмі важная падзея – сустрэча
са Святым Айцом Бэнэдыктам XVI. Прыёр супольнасці “Taize”, брат Алоіз расказаў у інтэрв’ю
нашаму радыё, што падрыхтоўка да сустрэчы ў Рыме ідзе поўным ходам. “Валанцёры прыбылі
сюды два дні таму і дапамагаюць у парафіях і месцах прыёму; дапамагаюць таксама падрыхтаваць
спевы і малітвы і ўпарадкаваць месцы ў якіх пілігрымы сустрэнуцца для супольнай малітвы:
сем касцёлаў, чатыры базылікі і іншыя вялікія святыні ў цэнтры Рыма”, - адзначыў брат
Алоіз.
Законнік таксама адзначыў важнасць таго, што сустрэча “Taize” праходзіць
у Рыме – у сэрцы хрысціянства. “Маладыя людзі паходзяць з розных краін, а таксама
розных Цэркваў. Сярод іх ёсць як католікі, так і праваслаўныя і пратэстанты. Мы хочам
жыць на знак Хрыста, які аб’ядноўвае. Хрыстус ужо даў нам пэўнае адзінства, якое з’яўляецца
рэальным, нават калі не ўпоўні дасягнутым. Таму мы хочам святкаваць разам тут, у Рыме
і асабліва жадаем прыняць удзел у супольнай малітве са Святым Айцом вечарам у суботу,
на плошчы св. Пятра”, - сказаў брат Алоіз.
Прыёр супольнасці “Taize” выказаў
спадзяванне, што пасля закліку Папы да рымлянаў больш актыўна прымаць пілігрымаў у
свае парафіі і сем’і, праблемы з начлегам для іх не павінна быць. Ён расказаў, што
на сённяшні дзень яшчэ ёсць патрэба прыкладна ў тысячы месцаў, але на яго думку, яна
будзе хутка вырашана.