«Լիբանանի Պատմական Առաքելութիւնը Կ՛առաջադրէ, Որ Անիկա Չէզոք Մնայ»
Յայտարարեց Կարտինալ Ռայի«Լիբանանի բնոյթը ըստ էութեան չէ փոխուած, եւ լիբանանցիներու մշակոյթին սկզբունքը համակեցութիւնն ու համախոհութիւնն է», յայտարարեց մարոնիներու Պշարա Ռայի կարտինալը երէկ` հոգեւոր հանդիպումի մը ընթացքին:
Լիբանանեան զանազան համայնքները ներկայացնող հոգեւոր կղերականներու պատուիրակութեան ներկայութեան արտասանած իր ողջոյնի խօսքին մէջ Ռայի պատրիարքը յայտնեց, որ «2013-ը «Հանդիպումի տարի» պիտի կոչենք»: Շնորհաւորական այցելութեանց առիթով կայացած այս հոգեւոր հանդիպումին կարտինալ Ռայի յոյս յայտնեց, որ Լիբանան վերագտնէ իր նախկին աշխուժութիւնն ու եռուզեռը եւ վերամիանայ` խաղալով իրմէ ակնկալուած դերը այս Արեւելքին մէջ, եւ ըլլայ անոր խաղաղութեան ու կայունութեան ովասիսը: «Լիբանան չի կրնար առանցքներու մէջ մտնել, որովհետեւ անոր պատմական ու աշխարհագրական դերն ու դիրքը, ինչպէս նաեւ անոր պատմական առաքելութիւնը չեն արտօներ նման քայլ ու կ՛առաջադրեն, որ անիկա ըլլայ յանձնառու` չէզոքութեան ու խաղաղութեան», ընդգծեց Ռայի պատրիարքը:
| All the contents on this site are copyrighted ©. |