Нунцый у Сірыі: Божае Нараджэнне надзеі і салідарнасці
Нягледзячы на цярпенні
і пакуты, звязаныя з ваенным канфліктам, сірыйскія хрысціяне адчуваюць надзею, якую
нясе ўрачыстасць Божага Нараджэння. Аб гэтым у інтэрв’ю нашаму радыё расказаў Апостальскі
нунцый у Сірыі арцыбіскуп Марыё Дзэнары. Ён адзначыў, што ў краіне, ахопленай крывавым
канфліктам, нягледзячы ні на што святкуецца Божае Нараджэнне – “таямніца радасці і
салідарнасці Бога ў Езусе з людзьмі”. Паводле дыпламата, радасць і атмасфера Божага
Нараджэнне не бачна ў знешніх праявах, “таму што няма магчымасці цэлебраваць св. Імшу
апоўначы, як гэта было ў мінулыя гады”. Ён расказаў, што святочныя набажэнствы цэлебраваліся
днём з прычыны небяспечнай сітуацыі. “Ужо ў пяць вечара тут пануе ноч, а калі падумаць
яшчэ аб некаторых месцах, як напрыклад Алепа, дзе цалкам адсутнічае электрычнасць,
так тут зусім цёмны горад”, - сказаў арцыбіскуп. Апостальскі нунцый адзначыў, што
акрамя праблем са святлом, у сірыйскіх гарадах існуюць вялікія праблемы з харчаваннем,
кошты якога ўзраслі ў дзесяткі разоў. “Божае Нараджэнне нясе яшчэ з сабой надзею,
радасць, але напэўна больш глыбокую, якая не выражаецца ў святкаваннях, якія яшчэ
ў мінулыя гады была магчымасць рабіць нават з фанфарамі пасля начной св. Імшы”, -
сказаў дыпламат.
Асаблівую ўвагу арцыбіскуп Дзэнары звярнуў на салідарнасць,
якая існуе паміж хрысціянамі ў Сірыі. “Я усё больш для сябе адкрываю гэту салідарнасць,
якая не толькі не памяншаецца, але нават узрастае. Існуе цудоўная салідарнасць паміж
сем’ямі, якія часта не маюць вялікіх магчымасцяў, і ёсць салідарнасць, якая паходзіць
з замежжа. Узгадаем напрыклад аб шчодрым дары Бэнэдыкта XVI і Сінадальных Айцоў”,
- сказаў прадстаўнік Святога Айца.
Апостальскі нунцый расказаў, што перад Божым
Нараджэннем законнікі набывалі прадукты для бедных сем’яў, а валанцёры, сярод якіх
былі як хрысціяне, так і мусульмане, раздавалі гарачую ежу на вуліцах.
На
цяжкую сітуацыю ў Сірыі звярнуў увагу ў сваім пасланні “Urbi et Orbi” 25 снежня Бэнэдыкт
XVI. Пантыфік рашуча заклікаў спыніць кровапраліццё і знайсці палітычную магчымасць
вырашэння існуючага канфлікта.