Në Nigeri, gjashtë të krishterë vriten në një Kishë në veri të vendit.
Sot, Shën Shtjefnit, dëshmitar i parë i Krishtit, Kishës iu shtuan gjatë dëshmitarë
të rinj, nga Nigeria e largët, e martirizuar, e kujtuar me shqetësim e dashuri nga
Papa në mesazhin e djeshëm ‘Urbi et Orbi’- Romës e Botës:“Lindja e Krishtit ndihmoftë
për kthimin e … harmonisë në Nigeri, ku atentate mizore terroriste vijojnë të shkaktojnë
viktima, posaçërisht ndër të krishterët”, janë fjalët e Bnediktit XVI. Ndërsa
Papa kremtonte në Bazilikën e Shën Pjetrit, Natën e Krishtlindjes, Kisha e Perit,
në shtetin e Jobes, në veri të vendit, u sulmua. Pasojat, gjashtë të vrarë. Ndërmjet
tyre, meshtari. E Kisha në flakë.
Krishlindje tjetër e përgjakshme, kjo, për
të krishterët e Nigerisë. Një grup njerëzish të armatosr hyri në mesnatë në Kishën
e Perit, fshat pak kilometra larg Potiskumit, kryeqytet ekonomik i shtetit verior
të Jobes. Gjashtë viktima, ndërmjet besimtarëve, të pranishëm në Meshën e Mesnatës.
Viktimë, edhe meshtari, që kremtonte në eleterin e Kishës së vogël, lindjen e Zotit.
Autorët e këtij krimi të ri besohet të jenë fanatikët e Boko Haram, grup islamist,
që e përdor dhunën me qëllime politike e që, pikërisht për këtë arsye, i ka shpallur
luftë bashkësisë së krishterë. Në Krishtlindjen e vitit të kaluar, terroristët
e Boko Haram ishin autorë të një atentati gjakatar kundër disa kishave nigeriane.
E atentate të tilla nuk munguan as sivjet. Zona e Potiskumit është me shumicë myslimane,
por edhe të krishterët formojnë një bashkësi të fortë, që nuk e ka aspak ndër mend
të largohet nga vatrat e nga Kishat e veta.