Krishtlindja me Papën: “Paraqitja e Jezusit në Tempull”
Emisioni i 18 i rubrikës “Krishtlindje me Papën”, na çon në Tempullin e Jeruzalemit,
ku vërejmë menjëherë lidhjen e Jezusit me historinë e me Ligjin e Izraelit, gjë që
na kujton misionin e tij universal, shëlbimin e mbarë botës. Luka e përfundon rrëfimin
kushtuar lindjes së Jezusit me ngjarjen që, sipas Ligjit të Izraelit, ndodhi në ditën
e tetë e në atë të dyzetë pas lindjes së Zotit. Dita e tetë është ajo e rrethprerjes,
e dyzeta, e pastrimit të Marisë, e shpërblimit të djalit të parë me një flije sipas
ligjit dhe e paraqitjes së Foshnjës në Tempull. Në Librin e Levitikut shkruhet: “Djali
le të rrethpritet në të tetën ditë, ndërsa gruaja të presë edhe tridhjetë e tri ditë
për të pastruar gjakun” (cfr Lv 12,1-4). Më pas duhet të bëjë flijen e pastrimit,
një qëngj, një pëllumb ose një turtull për mëkatin. Të varfërit mund të flijojnë dy
turtuj ose dy pëllumba”. Maria mblaton flijen e të varfërve (cfr Lk 2,24).
I gjithë Ungjilli i Lukës përshkohet tejembanë nga teologjia e të varfërve dhe e varfërisë,
përmes së cilës kuptojmë se Jezusi kishte lindur në një familje të varfër të Izraelit
e se pikërisht ndërmjet të varfërve mund të përmbushej premtimi. Ndërsa përmes pastrimit
të Marisë, që nuk kishte aspak nevojë të pastrohej, kuptojmë ç’do të thotë të lindësh
‘nën Ligj’. E ajo i nënshtrohet Ligjit, sepse vetëm kështu mund të arrihej në përmbushjen
e premtimit. Pastrimi i Nënës së Virgjër sjell pastrimin e botës. Tek Ungjilli
i Shën Lukës, kujton Benedikti XVI në librin e tij “Fëmijëria e Jezusit”, gjejmë edhe
hollësira të tjera, si pagesa e pesë siklave për të Parëlindurin, veçantia e Foshnjës,
që nuk dorëzohet në tempull nga prindërit, por nga vetë Ati Hyjnor, paralajmërimi
i Profetit Simeon e i profeteshës Ana, frymëzuar nga Shpirti Shenjt, thellimi i shpjegimit
të fjalës ‘i drejtë’ si dhe i fjalës ‘ngushëllim’ (paráklesis), përmes së cilës jehon
zëri i Shën Gjonit: “Ai është Parakliti, Hyji ngushëllues”. Lutja e Simeonit
“Tashti merre, o Zot, shërbëtorin tënd sipas Fjalës sate, në paqen tënde; sepse
sytë e mi panë shpëtimin që vjen prej teje, atë shpëtim, që ti e caktove
të jetë për mbarë popujt, mjet shëlbimi, dritë për gjithë kombet e
lumni për popullin tënd, Izraelin!”, kështu si na e transmeton Luka, në Kishat
e Lindjes e të perëndimit, bën pjesë në lutjen liturgjike të natës. Njëherësh me Benedictus
e Magnificat, i përket trashëgimisë së lutjeve të Kishës më të lashtë judeo-kristiane. Në
këtë himn, shkruan Papa, gjejmë dy pohime kristologjike. Jezusi është ‘Dritë për gjithë
kombet’ e ‘lumni për popullin e Hyjit, Izraelin' (Lk 2,32), të dy, pohime që
i gjejmë tek Izaia Profet (42,6;49,6). Kështu dy profetët kujtuan rrethin e
shpresave të premtuara e gjetën fillin e humbur në Tempull, në pikën e ndaljes së
Dritës. Duhet ta kemi mirë parasysh se këtu nuk flitet për të kaluarën, na kujton
Papa Ratcinger. Të gjithë e dimë se Krishti sot është shenjë kundërshtie e se vetë
Hyji shikohet si kufi i lirisë sonë, kufi që duhet zhdukur, në se njeriu dëshiron
të jetë plotësisht vetvetja. E kjo, sepse Zoti, me të vërtetën e tij, i kundërvihet
egoizmit, marrëzisë së madhështisë, prirjes për të mashtruar, për të kapërcyer kufijtë
e ndaluar mes qiellit e tokës. Zoti është dashuri. Por dashuria mund edhe të urrehet,
atje ku dilet nga vetvetja, për të shkuar përtej vetvetes. Dashuria nuk është ndjenjë
romantike e mirëqenies, nënvizon Papa, e shëlbimi nuk ka të bëjë fare me vetëdashjen,
me vetëpërkëdheljen, me vetëdukjen, por pikërisht me çlirimin nga mbyllja në vetvete,
nga vetëpëlqimi. E ky çlirim nuk është aspak i lehtë: paguhet me çmimin e mundimeve
e të gozhdimit në kryq. E edhe me shpatën, që përshkon tej për tej zemrën e Marisë.
Profecia e dritës dhe fjala kryq shkojnë krah për krah. Teologjia e lumnisë lidhet
në mënyrë të pazgjidhshme me teologjinë e Kryqit, na kujton Papa, në sa vepra e tij
Fëmijëria e Jezusit hap para syve tanë skenën e re të shtegtimit të Mbretërve Dijetarë,
prirë nga Kometa, drejt Shpellës së Betlehemit.