Папа: насычаная праграма на Божае Нараджэнне і Новы год
Вігілійная св. Імша
на Божае Нараджэнне 24 снежня ў 22.00 і ўрачыстае благаслаўлене “Urbi et orbi” (Гораду
і свету) у аўторак днём, гэта асноўныя моманты святочных дзён для Папы ў Ватыкане.
Сёлета Бэнэдыкта XVI чакае такая ж шырокая праграма літургічных мерапрыемстваў, як
і ў папярэднія гады. Вігілійная св. Імша, якая доўжыцца больш за дзве гадзіны, была
перанесена з поўначы на 22.00, каб 85-гадовы Пантыфік меў больш часу на адпачынак
да святочнага благаслаўлення “Urbi et orbi” у першы дзень Божага Нараджэння. Перад
ім Бэнэдыкт XVI традыцыйна звернецца з заклікам да міру і справядлівасці ў крызісных
рэгіёнах свету і прамовіць святочныя віншаванні на дзясятках моваў. Перад святочным
набажэнствам на заканчэнне году, якое Бэнэдыкт XVI узначаліць 31 снежня ў 17.00, сёлета
Папу чакае яшчэ адно дадатковае мерапрыемства: 29 снежня ён сустрэнецца ў 18.00 з
удзельнікамі арганізаванай экуменічнай супольнасцю “Тэзэ” Еўрапейскай малітоўнай сустрэчы,
якая пройдзе ў гэтым годзе ў Рыме. Цырымонія была перанесена з базылікі св. Пятра
на плошчу перад ёй з-за вялікай колькасці моладзі, жадаючай паўдзельнічаць у сустрэчы
з Папам.
У сам Новы год Каталіцкі Касцёл адзначае Сусветны дзень міру. Бэнэдыкт
XVI у 9.30 узначаліць св. Імшу з гэтай нагоды. У той жа час 6 снежня, ва ўрачыстасць
Аб’яўлення Пана, Папа правядзе абрад кансэкрацыі новых біскупаў. Імі стануць некалькі
супрацоўнікаў Рымскай курыі, у тым ліку яго асабісты сакратар кс. Георг Генсвайн,
які ў дадатак быў прызначаны новым Прэфектам Папскага дому. Праз тыдзень, 13 студзеня,
ва ўрачыстасць Хросту Пана, Бэнэдыкт XVI правядзе св. Імшу ў Сікстынскай капэле, падчас
якой удзеліць сакрамэнт хросту некалькім дзецям.