Беларусь: каталіцкая моладзь у прадчуванні сустрэчы з Бэнэдыктам XVI
Маладыя католікі Беларусі
прымуць удзел ў Еўрапейскай сустрэчы моладзі, арганізаванай супольнасцю “Тэзэ”. Каля
тысячы з паловай пілігрымаў з усёй краіны праз некалькі дзён, 28 снежня, адправяцца
ў Рым – у гэтым годзе менавіта сталіца заходняга хрысціянства прымае гэты міжнародны
форум. Дарэчы, ужо 35-ы па ліку. Айцец Сяргей Трысцень, кармэліт – не першы раз арганізуе
пілігрымку з Беларусі, і з кожным годам да яе далучаецца ўсё больш вернікаў. “Едуць
на гэтую сустрэчу не толькі католікі, гэта экуменічны форум. Увогуле, супольнасць
“Тэзэ” – экуменічная супольнасць, да яе належаць браты не толькі каталіцкага веравызнання,
але і пратэстанцкага, і праваслаўнага. У нашай моладзевай групе ёсць таксама вернікі
пратэстанты і праваслаўныя, а нават і атэісты, якіх могуць цягнуць за сабой іх сябры-хрысціяне,
і праз гэта яны таксама могуць убачыць дарогу да Бога”, - падзяліўся айцец Сяргей.
У
1940 г. брат Ражэ арганізаваў экуменічную супольнасць у французскай вёсцы Тэзэ, а
напрыканцы 70-х стаў ініцыятарам “паломніцтва даверу на зямлі” – так называюцца праходзячыя
з тых часоў Еўрапейскія сустрэчы моладзі. Штогод на іх збіраецца ад 30 да 50 тыс.
чалавек з розных краін, заўсёды на Новы год, каб некалькі дзён правесці ў супольнай
малітве – адзначыў айцец Сяргей. “Сэнс такой сустрэчы менавіта падмацаванне веры людзей
з розных краін. І арганізатары імкнуцца, каб пілігрымы жылі не ў залах ці школах,
а ў сем’ях, каб падзяліцца сваёй верай і таксама ўбачыць сведчанне веры людзей у той
краіне, куды яны прыязджаюць з усёй Еўропы”, - дадаў арганізатар пілігрымкі з Беларусі.
Акрамя
малітвы, маладыя людзі правядуць дыскусіі, возьмуць удзел у канферэнцыях па актуальных
пытаннях духоўнага, сацыяльнага, культурнага жыцця. Чакае і шмат экскурсій па Вечным
горадзе – знакамітыя базілікі, паломніцтва да магіл апосталаў і ў катакомбы. А кульмінацыяй
форуму стане сустрэча ўсіх удзельнікаў з папам Бэнэдыктам XVI. “29 студзеня ў базіліцы
св. Петра адбудзецца сумесная малітва з Бэнэдыктам XVI. Моладзь чакае сустрэчы са
Святым Айцом, бо, напэўна, пантыфіку ёсць што сказаць моладзі, каб паказаць шлях,
якім хрысціянская моладзь можа крочыць далей у гэтым сучасным свеце”, - адзначыў
айцец Сяргей.
Затым традыцыйна ў навагоднюю ноч – гэта адна з цікавых падзей
форуму –праходзіць “Баль усіх народаў”. На ім кожная з дэлегацый прэзентуе сваю краіну.
“Мы звычайна спявалі Лявоніху, гулялі ў “ручаёк” ці прэзентавалі іншыя беларускія
адметныя спевы і танцы, каб пазабавіцца”, - прызнаўся законнік.
Якую візітную
картку прыгатуюць беларусы ў гэты раз – будзе вырашана ўжо ў аўтобусе, сумесна, смяецца
айцец Сяргей. Увогуле ж сама дарога ў Рым будзе добрай падрыхтоўкай да сустрэчы, бо
гэта пілігрымка з ўсімі яе атрыбутамі.