அணுசக்தி தொடர்பாக இரானுடன் பேச்சுவார்த்தையில் ஈடுபடுமாறு அமெரிக்க ஆயர் ஒருவர் வேண்டுகோள்
டிச.21,2012. அணு ஆயுதங்கள் மற்றும் அணுசக்தியைப் பொருத்தவரை, அமெரிக்க ஐக்கிய நாட்டுக்கும்
இரானுக்கும் இடையே இடம்பெறும் பிரச்சனைகளுக்கு அமைதியான வழிகளில் தீர்வுகள் காணப்படுமாறு
கேட்டுக் கொண்டார் ஆயர் Richard E. Pates. அணு விவகாரத்தில் இவ்விரு நாடுகளுக்கும்
இடையே தொடர்ந்து அதிகரித்துவரும் பிரச்சனைகள் தீர்க்கப்படுவதற்குத் துணிச்சலான நடவடிக்கைகள்
எடுக்கப்படுமாறு கேட்டுள்ளார் அமெரிக்க ஆயர் பேரவையின் அனைத்துலக விவகாரங்கள் ஆணையத்
தலைவரான ஆயர் Pates. அமெரிக்க அரசுத்தலைவர் ஒபாமா நிர்வாகத்தின் தேசியப் பாதுகாப்பு
ஆலோசகருக்கு இது குறித்து கடிதம் எழுதியுள்ள ஆயர் Pates, ஆபத்தான சூழல், அமெரிக்க ஐக்கிய
நாட்டையும், இரானையும், அனைத்துலக சமுதாயத்தையும் அச்சுறுத்துகின்றது என்று குறிப்பிட்டு,
இதற்கு அமைதிப் பேச்சுவார்த்தை மூலம் தீர்வு காணுமாறு வலியுறுத்தியுள்ளார்.