Արամ Ա. Կաթողիկոսի Հանդիպումը Եուհաննա Ժ. Եազիժի Պատրիարքին Հետ
Չորեքշաբթի, 19 դեկտեմբեր 2012-ի երեկոյեան, Արամ Ա. կաթողիկոս այցելեց Անտիոքի յոյն
ուղղափառ եկեղեցւոյ նորընտիր Եուհաննա Ժ. Եազիժի պատրիարքին` Պալամանտի վանքին մէջ, եւ
շնորհաւորեց անոր ընտրութիւնը: Վեհափառը յայտնեց, որ յատուկ բարեկամական կապեր ու սերտ
գործակցութիւն գոյութիւն ունեցած է Մեծի Տանն Կիլիկիոյ կաթողիկոսութեան եւ Անտիոքի յոյն
ուղղափառ եկեղեցւոյ միջեւ եւ յոյս յայտնեց, որ նորընտիր պատրիարքին օրով վերանորոգ թափով
շարունակուի այդ գործակցութիւնը: Վեհափառ հայրապետը նաեւ յիշեցուց, որ որեւէ ժամանակէ
աւելի Միջին Արեւելքի ներկայ պայմաններուն դիմաց քրիստոնեայ համայնքներ կոչուած են աւելի
խորացնելու իրենց գործակցութիւնը: Նորընտիր պատրիարքը իր կարգին յայտնեց, որ ամբողջութեամբ
կը բաժնէ վեհափառ հայրապետին մօտեցումները եւ ինք ու իր եկեղեցին յանձնառու կը մնան բոլոր
եկեղեցիներուն հետ գործակցելու` ի խնդիր քրիստոնէական ներկայութեան եւ վկայութեան աւելի
հզօրացման: