Atë Lombardi për fjalët e Papës para Kuries Romake, për urimet e Krishtlindjes: Familja
dhe e vërteta!
Të premten, Papa Benedikti XVI shkëmbeu urimet me kardinajtë e punonjësit e Kuries
Romake, që e ndihmojnë Atin e Shenjtë në qeverisjen e Kishës në mbarë botën. Dy temat
themelore, që përshkuan fjalën e Papës, qenë familja dhe dialogu. Sipas tij, thelbi
i vërtetë i lirisë njerëzore është mbrojtja e familjes, brenda së cilës luhet fati
i njeriut. Zëdhënësi i Selisë së Shenjtë, atë Federiko Lombardi, ia kushton këtij
argumenti komentin e sotëm: Fjalimi i fundvitit para Kuries Romake, për urimet
e Krishtlindjes, është gjithmonë një ndër më personalët e më të studjuarit e Atit
të Shenjtë. Reflektim për vitin e kaluar, por edhe thellim në temat, që Papa i konsideron
më urgjente e më aktuale. Janë gjëra, për të cilat e ndjen si detyrë të japë mendimin
e tij, me themel, me qartësinë e guximin, që e karakterizojnë: është detyra e tij
ndaj Kishës dhe njerëzimit, megjithëse kjo mund të shkaktojë kundërshti, ose reagime
negative. Temat e zgjedhura për këtë vit janë dy: familja e dualiteti i burrit e i
gruas; si edhe dialogu e kumtimi i fesë. Përsa i përket familjes, Papa nuk hyn
në diskutime për legjislacionin e për martesat ndërmjet homoseksualëve, e nuk përmend
as edhe fjalët e paharrueshme të afërsisë me çiftet në vështirësi, të shqiptuara gjatë
lutjes në Milano (Takimi Botëror i familjeve), por pohon se sot është në lojë thelbi
i çështjes “kush është njeriu”. Dualiteti i burrit dhe i gruas është thelbësor për
qënien njerëzore. Prej tij lindin marrëdhëniet themelore ndërmjet babait, nënës e
fëmijëve. Dualiteti është i shkruar në natyrën e njeriut, në planin e Zotit Krijues.
Mohimi i tij shkon kundër së vërtetës, pohimi se është vetë qënia njerëzore, ai që
e përcakton identitetin e vet, është një hap shkatërrimtar, që i hap rrugën manipulimit
arbitrar të natyrës, me pasoja shumë të rënda për dinjitetin e njeriut; duke filluar
nga dinjiteti i bijve, konsideruar objekt i kësaj së drejte e jo subjekt të drejtash.
Në “luftën për familjen” pra, është në lojë vetë qenia njerëzore. Papa u referohet
gjerësisht shkrimeve të Rabinit të Madh të Francës, duke dëshmuar se qëndrimi i Kishës
nuk është thjesht konfesional, por ka të bëjë me arsyen, e cila është e përbashkët
për traditën e madhe judeo-kristiane. Edhe tema e dytë, në të cilën ndalet Papa,
shkakton diskutime. Është tejet aktuale e lidhet me të parën: i krishteri hyn në dialog
si bartës i shpresës së madhe të njerëzimit, parë në dritën e fesë, duke e ndjerë
veten përgjegjës për vlerat më të çmuara e më të qëndrueshme, përtej zgjidhjeve thjesht
pragmatike. E hyn në dialog me besimin se kërkimi i së vërtetës nuk do ta vërë kurrë
në diskutim identitetin e tij të krishterë. Sepse e vërteta nuk zotërohet me krenari
prej nesh, por na thërret e na udhëheq, ashtu si Krishti, që na merr për dore. Edhe
ky është urim për Krishtlindje. I thellë, sfidues, aktual.