Ս. Խաչ-Հարպոյեան Բարձրագոյն Վարժարանի Հիմնադրութեան 25-ամեակի Եզրափակիչ Ձեռնարկ. Ս.
Պատարագ Եւ Ս. Խաչի Յուշակոթողի Օրհնութիւն։
Հարպոյեան բարձրագոյն վարժարանի հիմնադրութեան արծաթեայ յոբելեանին առիթով, վարժարանի
տնօրէնութիւնը զանազան հանդիսութիւններով եւ ձեռնարկներով նշեց յոբելենական տարին` լուսարձակի
տակ առնելով այս կրթական հաստատութեան 25-ամեայ վաստակը, յաջողութեան ուղիին վրայ անոր
արձանագրած պատուաբեր հանգրուանները եւ դէպի նոր բարձունքներ հասնելու անոր անկոտրում
կամքը: 25 տարիներ շարունակ մեսրոպեան ջահը անմար պահող, հայ աշակերտին լոյս, գիտութիւն
եւ հաւատք ջամբող այս օճախը, այսօր, քառորդ դարեայ իր բեղմնաւոր պատմութեան գիրքին մէջ
նոր էջ մը կը բանայ` հոն արձանագրելու համար ոսկեայ տառերով գրուելիք նոր ձեռքբերումներ
ու նուաճումներ: Արդարեւ, այս յոբելենական տարուան տօնակատարութիւններու շարքը եզրափակուեցաւ
Ս. պատարագով, որ տեղի ունեցաւ Զալքայի Ս. Խաչ եկեղեցւոյ մէջ, կիրակի, 16 դեկտեմբերի
երեկոյեան ժամը 5-ին: Պատարագը մատուցեց, անոր հանդիսապետեց եւ յաւուր պատշաճի քարոզեց
Տանն Կիլիկիոյ կաթողիկէ հայոց Ներսէս Պետրոս ԺԹ. պատրիարք: Ամենապատիւ հոգեւոր տէրը,
(հայերէն եւ արաբերէն լեզուներով) իր քարոզին մէջ կոչ ուղղեց իբրեւ քրիստոնեաներ ապրելու
եւ հայազգի զաւակներուն սփռելու լուսաւորչեան հաւատքը: Իր քարոզին աւարտին Ամենապատիւ
հոգեւոր տէրը դրուատեց դերը հայ դպրոցին, գնահատեց վարժարանին կրթական մարմիններուն աշխատանքը
եւ խնդրեց Աստուծմէ, որ Իր լիառատ օրհնութիւնները տայ եւ Իր հովանիին տակ պահէ բոլորը: Պատարագի
աւարտին, ներկաները թափօրով դուրս եկան եկեղեցիէն ու հաւաքուեցան վարժարանի դէպի եկեղեցի
նայող պատին վրայ տեղադրուած Ս. Խաչի յուշակոթողին մօտ, որ սիրայօժար կերպով նուիրուած
է վարժարանի ծնողներէն` Սարգիս Պասթրմաճեան ընտանիքին կողմէ: Այնուհետեւ, ՀԿՄ-ի շեփորախումբի
նուագներուն ընկերակցութեամբ, Ս. Խաչ արիներու խմբապետները յուշակոթողին վրայէն վար առին
հայկական դրօշակը եւ օրհնութիւնը կատարուեցաւ ամենապատիւ հոգեւոր տիրոջ կողմէ, որ այս
բարեբաստիկ առիթով օրհնութեան գիր յանձնեց վարժարանի հիմնադիր բարերար` հանգուցեալ Կարպիս
Հարպոյեանի տիկնոջ, բարձր գնահատելով հանգուցեալին շնորհակալ, օրինակելի եւ գերգնահատելի
աշխատանքը, որուն առաջին քայլին` դպրոց կառուցելու ազգակերտ երազը իրականութիւն դարձնելու
շնորհիւ, 25 տարիներէ ի վեր այս օճախը եղած է հազարաւոր հայ մատղաշ հոգիներու դարբնոցը,
անոնց ազգային դիմագիծը կերտող կաճառը եւ տուած է բազմաթիւ շրջանաւարտ սերունդներ: Հրավառութիւններու
տօնական մթնոլորտին ներքոյ ներկաները ուղղուեցան «Պետողլեան» սրահ, ուր հիւրասիրութեան
կողքին շնորհաւորութիւններ ընդունուեցան` վարժարանին մաղթելով նորանոր յաջողութիւններ
եւ բեղուն տասնամեակներ: